शिंदखेड्यात ८ कर्मचारी कोरोना पॉझिटिव्ह

चिमठाणे : शिंदखेडा पंचायत समितीचे चार कारकून व चार परिचर बुधवारी (ता.१९) कोरोनाबाधित (corona positive) आढळल्याने खळबळ उडाली होती. मात्र गुरुवारी (ता. २०) ला दुपारी तीनला सभापती निवडीसाठी भारतीय जनता पक्षांचे (BJP)कार्यकर्ते व प्रशासन यांनी कोरोनाचे सर्व नियम धाब्यावर बसवून सभापती निवड केली.

गेल्या काही दिवसांपासून तालुक्यात कोरोना संसर्गाने डोके वर काढले आहे. शिंदखेडा व दोंडाईचा शहरासह ग्रामीण भागात कोरोना रुग्णांच्या संख्येचा आलेख दिवसेंदिवस वाढत आहे. मात्र कुठल्याही शासकीय कार्यालयात अधिकाऱ्यासह कर्मचारी आणि नागरिक व ग्रामस्थ कुठलेही कोरोनाचे नियमांचे पालन न करता बिनधास्त आहेत. गुरुवारी (ता. २०) तालुक्यात ३७ रूग्ण कोरोना पॉझिटिव्ह आले असून असे एकूण ७८ रूग्ण तालुक्यात कोरोना पॉझिटिव्ह आहेत.

सभापती निवडीवेळी गर्दी

शिंदखेडा पंचायत समितीच्या सभापती निवडीवेळी अधिकाऱ्यांसह कर्मचारी व पंचायत समिती सदस्य जिल्हा परिषद सदस्य आणि भारतीय जनता पक्षाचे कार्यकर्ते यांनी तर साधे मास्कही तोंडावर लावले नव्हते. सभापतीपदी अनिता पवार यांची बिनविरोध निवड झाल्यानंतर भाजपच्या कार्यकर्त्यांना कोरोनाचा जणू विसर पडली की काय असा प्रश्न उपस्थित होत आहे.