BSF जवानाच्या गोळीबारात 4 जवान शहीद; कोर्टाकडून अधिकाऱ्यांच्या चौकशीचे आदेश

अमृतसर : 6 मार्चला पंजाबमधील अमृतसर इथं बीएसएफच्या (BSF) 144 बटालियनच्या मुख्यालयात बीएसएफ जवानानं केलेल्या गोळीबारात 4 जवान शहीद झाले होते. या घटनेत एक जवानही गंभीर जखमी झाला आहे.

आपल्या साथीदारांवर गोळ्या झाडल्यानंतर, बीएसएफ जवान सत्ताप्पा सिद्धप्पा (Satteppa Siddappa) यांनी स्वत:वरही गोळी झाडली. यानंतर आता बीएसएफच्या कोर्ट ऑफ इन्क्वायरीनं पाच अधिकारी आणि एका व्यक्तीवर विभागीय कारवाईची शिफारस केलीय. यामध्ये मुख्य वैद्यकीय अधिकारी (CMO) आणि डेप्युटी कमांडंटचा समावेश आहे. सत्ताप्पाच्या मानसिक स्थितीकडं दुर्लक्ष केल्याचा त्यांच्यावर आरोप आहे.

या घटनेच्या तपासात असं आढळून आलंय की, आरोपी बीएसएफ कॉन्स्टेबल सत्ताप्पाला गोळीबाराच्या 15 मिनिटं आधी म्हणजेच, सकाळी 9.30 च्या सुमारास युनिट हॉस्पिटलमधून सोडण्यात आलं. त्यानंतरच त्यानं साथीदारांवर गोळीबार केला होता. त्यानं ज्या लोकांना गोळ्या घालून ठार केलं, त्यात त्याचा मित्रही होता. जो सत्ताप्पाची काळजी घेत असतं. रतनलाल नावाच्या या जवानानं घटनेच्या तासाभरापूर्वी साताप्पाला नाश्ताही दिला होता, असंही कळतंय.