राज्यात गेल्या काही दिवसांपासून सुरू असलेल्या पावसाला आता काही प्रमाणात उघडीप मिळाली आहे. मॉन्सूनचे प्रवाह कमकुवत झाल्याने राज्यातील बहुतांश भागांत पावसाचा जोर कमी झाला असून, ढगाळ वातावरणासह तुरळक ठिकाणी हलक्या पावसाचा अंदाज हवामान विभागाने वर्तविला आहे. दरम्यान, बंगालच्या उपसागरातील कमी दाब क्षेत्रामुळे विदर्भात पावसाला पोषक हवामान निर्माण झाले आहे. त्यामुळे आज संपूर्ण विदर्भासह नांदेड जिल्ह्यात काही ठिकाणी विजांच्या कडकडाटासह वादळी पावसाची शक्यता आहे. या पार्श्वभूमीवर हवामान विभागाने विदर्भ आणि नांदेडसाठी येलो अलर्ट जारी केला आहे. पश्चिम बंगाल, ओडिशा आणि झारखंड परिसरात ठळक कमी दाबाचे क्षेत्र सक्रिय झाले आहे. ही कमी दाबाची प्रणाली पुढील काळात पश्चिम-वायव्य दिशेने ओडिशा आणि झारखंडच्या दिशेने सरकण्याची शक्यता आहे. या प्रणालीच्या प्रभावामुळे विदर्भातील काही भागांत पावसाची शक्यता वाढली आहे.
