NCP Crisis : राष्ट्रवादी पक्ष नेमका कोणाचा? निवडणूक आयोगातील सुनावणीबद्दल अजित पवार म्हणाले...

राष्ट्रवादीचे नेते अजित पवार यांनी २ जुलै रोजी एकनाथ शिंदे आणि देवेंद्र फडणवीस यांच्यासोबत सत्तेत सहभागी होण्याचा निर्णय घेतला आणि राज्याच्या राजकारणत खळबळ उडाली. अजित पवारांच्या बंडानंतर राष्ट्रवादी काँग्रेसमध्ये दोन गट पडल्याचे पाहायला मिळले. आता शरद पवार गट आणि अजित पवार गट या दोन्हीकडून पक्षावर दावा सांगितला जात आहे. यादरम्यान निवडूक आयोगासमोर ६ ऑगस्ट रोजी होणाऱ्या सुनावणीबद्दल उपमुख्यमंत्री अजित पवार यांनी प्रतिक्रिया दिली आहे.

दरम्यान राष्ट्रवादी पक्षाचे चिन्ह दोन्हीपैकी कोणत्या गटाला मिळणार आणि पक्ष नेमका कोणाचा? यासाठी निवडणूक आयोगसमोर सुनावणी होणार आहे. राष्ट्रवादी पक्षाचे चिन्ह आणि नावाच्या दाव्यावर भारतीय निवडणूक आयोगाच्या सुनावणीवर राष्ट्रवादीचे नेते आणि महाराष्ट्राचे उपमुख्यमंत्री अजित पवार यांनी प्रतिक्रिया दिली आहे. "प्रत्येकाला आपली बाजू मांडण्याचा अधिकार आहे, आम्हीही आमची बाजू निवडणूक आयोगासमोर ठेवू." असं अजित पवार म्हणाले आहेत.

राष्ट्रवादी खरी कुठली? असं विचारलं असता अजित पवार म्हणाले की ते सांगतील ना, प्रत्येकजण आपआपली भूमिका मांडणार. त्यासंदर्भात ज्यांना बोलवलं आहे ते आपली बाजू कशी उजवी आहे याबद्दल निवडणूक आयोगाला पटवून देतील आणि इलेक्शन कमिशनला तो अधिकार सर्वोच्च न्यायालयाने दिला आहे. ते दोघांचं ऐकून घेतील आणि निर्णय घेतील आणि त्यांनी दिलेला निर्णय दोघांना मान्य करावा लागेल असेही आजित पवार म्हणाले.

दरम्यान शिवसेनेमध्ये झालेल्या लढ्याप्रमाणेच राष्ट्रवादी काँग्रेसमध्ये देखील चिन्ह आणि पक्षावरुन वाद निर्माण झाला आहे. शरद पवार गटाकडून निवडणूक आयोगात उत्तर दाखल केलं असून राष्ट्रवादी काँग्रेस पक्ष फुटला नसून काही लोकांनी वेगळी भूमिका घेतल्याचं त्यात नमूद करण्यात आलं आहे. पक्षाचे पदाधिकारी हे शरद पवार यांच्या नेतृत्वाखाली काम करत असल्याचं उत्तरामध्ये म्हटलं आहे.

येत्या ६ ऑक्टोबरला पक्षनाव आणि चिन्ह कोणाला मिळणार याबद्दलची सुनावणी केंद्रीय निवडणूक आयोगासमोर होणार आहे. निवडणूक आयोगाच्या सुनावणीमध्ये काय निर्णय होतो, याकडे सर्वांचे लक्ष लागले आहे.