'तारक मेहता..'मधून 'टप्पू'ची होणार एग्झिट; 'बबिता'सोबत जोडलं गेलं होतं नाव

'तारक मेहता का उल्टा चष्मा' (Taarak Mehta Ka Ooltah Chashmah) या लोकप्रिय मालिकेतून आणखी एक कलाकार बाहेर पडणार आहे. या मालिकेत टप्पूची भूमिका साकारणारा अभिनेता राज अनाडकत (Raj Anadkat) ही मालिका सोडणार असल्याचं कळतंय. राजने मालिका सोडण्याचा निर्णय घेतला असून याविषयी निर्मात्यांसोबतही बोलणं झालं आहे. त्यामुळे ख्रिसमसच्या आधीच तो त्याचं शूटिंग पूर्ण करणार असल्याचं समजतंय. याआधीही मालिकेतल्या काही कलाकारांनी ही मालिका सोडली.

'ई टाइम्स'ने दिलेल्या वृत्तानुसार, गेल्या काही दिवसांपासून राज ही मालिका सोडण्याच्या विचारात होता. याविषयी त्याने मालिकेच्या निर्मात्यांसोबत चर्चादेखील केली. मात्र या चर्चेतून काही निष्पन्न झालं नाही. त्यातच राजचा करार संपत आला आहे. मालिका सोडण्याची राजची इच्छा असल्याने अखेर निर्मात्यांनीही कराराचं नुतनीकरण केलं नाही. त्यामुळे राज ही मालिका सोडणार असल्याचं निश्चित झालं आहे.

गेल्या काही महिन्यांत नेहा मेहता, गुरुचरण सिंग यांनी 'तारक मेहता..' ही मालिका सोडली. त्यात आता राजचाही समावेश झाला आहे. नेहा मेहताची जागा मालिकेत सुनन्या फौजदारने तर गुरुचरण सिंगची जागा बलविंदर सिंग सोढीने घेतली. राज या मालिकेत २०१७ पासून काम करत आहे. त्याने मालिकेत टप्पूची भूमिका साकारत असलेल्या भव्य गांधीची जागा घेतली. भव्यने जवळपास नऊ वर्षे टप्पूची भूमिका साकारली होती.

'बबिता'सोबत अफेअरच्या चर्चा

मालिकेत बबिताची भूमिका साकारणारी अभिनेत्री मुनमुन दत्ताला राज डेट करत असल्याच्या चर्चा होत्या. या दोघांच्या वयात नऊ वर्षांचं अंतर आहे. राज २४ वर्षांचा आहे तर मुनमुन ३३ वर्षांची आहे. सोशल मीडियावरील मुनमुनच्या फोटोंवर अनेकदा राजच्या कमेंटने नेटकऱ्यांचं लक्ष वेधलं होतं. मात्र या चर्चांमध्ये तथ्य नसल्याचं मुनमुनने स्पष्ट केलं होतं.