मेहुणीविरोधात ड्रग्ज केस, समीर वानखेडेंनी दिलं उत्तर

मुंबई: NCB मुंबईचे झोनल संचालक समीर वानखेडे (Sameer wankhede) यांच्यावर राष्ट्रवादी काँग्रेसचे नेते (Ncp) आणि प्रवक्ते नवाब मलिक (Nawab malik) दररोज वेगवेगळे आरोप करत आहेत. आज नवाब मलिक यांनी पुन्हा एकदा वानखेडेंवर व्यक्तीगत हल्लाबोल केला आहे.

समीर वानखेडे यांची पत्नी क्रांती रेडकरच्या बहिणीवरुन नवाब मलिकांनी प्रश्न उपस्थित केला आहे. "समीर दाऊद वानखेडे, तुमची मेहुणी हर्षदा दीनानाथ रेडकर ड्रग्जच्या व्यवसायात गुंतलेली आहे का?" असा नवाब मलिक यांनी सवाल केला आहे. समीर वानखेडे यांना उत्तर देण्याचं मलिकांनी आव्हान दिलं आहे.

'तिची केस पुणे कोर्टात प्रलंबित असल्यामुळे तुम्ही उत्तर द्या' असे ट्विट नवाब मलिक यांनी केले आहे. हा घ्या त्याचा पुरावा असं म्हणत ई कोर्ट सर्व्हिसेसवरील काही स्क्रिनशॉट शेअर केले आहेत. आता यावर समीर वानखेडेंनी आपली बाजू मांडली आहे.

"क्रांती रेडकरच्या बहिणीवर जानेवारी २००८ मध्ये गुन्हा दाखल झाला असेल. मी सप्टेंबर २००८ मध्ये IRS झालोय. २०१७ साली माझे क्रांतीशी लग्न झाले आहे. मग २००८ च्या प्रकरणाशी माझा काय संबंध?"असं समीर वानखेडे यांनी म्हटलं आहे.