Kolhapur : तुळजाभवानी मंदिर परिसरात दारू पिऊन दगडावर पडल्याने भिक्षुक ठार; खुनाचा संशय बळावला

कोल्हापूर : भवानी मंडप (Bhavani Mandap Kolhapur) येथील तुळजाभवानी मंदिर (Tuljabhavani Temple) परिसरात दारू पिऊन दगडावर पडल्यामुळे भिक्षुकाचा मृत्यू झाला. नारायण शिवाजी कसबे (वय ३०. रा. मूळ जामगाव ता. बार्शी, जि. उस्मानाबद. सध्या रा. अंबाबाई मंदिर परिसर) असे त्याचे नाव आहे.

याची फिर्याद वडील शिवाजी निवृत्त कसबे यांनी दिल्याचे जुना राजवाडा पोलिसांनी (Rajwada Police) सांगितले. दरम्यान, खून झाल्याच्या संशयामुळे पोलिसांची तारांबळ उडाली होती. पोलिसांनी सांगितले, की आई-वडील आणि मुलगा हे भिक्षुक आहेत. गेली वीस-पंचवीस वर्षे ते तुळजाभवानी मंदिराजवळ राहतात.

करवीर निवासिनी अंबाबाई मंदिर परिसरात भिक्षा मागून खातात. काल मध्यरात्री साडेतीनच्या सुमारास नारायण दारू पिऊन होता. तुळजाभवानी मंदिराजवळील पाण्‍याच्या टाकीजवळ त्याचा तोल जावून तो पडला. त्याच्या डोकीला गंभीर दुखापत झाली. त्याला पहाटे उठविताना त्याचा मृत्यू झाल्याचे निदर्शनास आले. दरम्यान, रात्री नारायणचा तेथीलच एका व्यक्तीशी पैशाच्या कारणावरून वाद झाला होता.

त्यामुळे हा खून झाला आहे काय? असा संशय बळावला. पोलिसांची धावपळ उडाली. मात्र पडून मृत्यू झाल्याचे डॉक्टरांनी सांगितल्यामुळे पोलिस आणि नातेवाईकांनीही सुटकेचा निःश्‍वास सोडला. वडिलांनीही मुलगा दारूच्या आहारी गेला होता. तो काल दारू पिऊन आला होता, त्याचा तोल जाऊन पडल्यामुळे मृत्यू झाल्‍याचेही सांगितले. त्यामुळे पोलिसांनी तशी फिर्याद नोंद करून घेतली.