सांगली जिल्हा परिषदेत संख्याबळ जमले तरच बदल: देवेंद्र फडणवीस

सांगली: जिल्हा परिषदेत अध्यक्ष बदलाचे पाऊल उचलताना संख्याबळ जमते का पाहा. मी स्वतः त्याची पडताळणी करतो. मुंबईत पुढील आठवड्यात बैठक घेऊ आणि मग निर्णय करु, अशी सूचना विरोधी पक्षनेते देवेंद्र फडणवीस यांनी जिल्हा भाजपच्या कोअर कमिटीला दिली.

पंढरपूर येथे श्री. फडणवीस यांच्या दौऱ्यात कोअर कमिटीने त्यांची भेट घेतली. खासदार संजय पाटील, आमदार सुधीर गाडगीळ, जिल्हाध्यक्ष, माजी आमदार पृथ्वीराज देशमुख, विलासराव जगताप, राजेंद्रअण्णा देशमुख, इस्लामपुरचे नगराध्यक्ष निशिकांत पाटील, माजी जि. प. अध्यक्ष संग्रामसिंह देशमुख, प्रदेश सरचिटणीस मकरंद देशपांडे, सम्राट महाडिक यांनी श्री. फडणवीस यांच्याशी स्वतंत्रपणे चर्चा केली. त्यांच्यापुढे जिल्हा परिषदेतील घडामोडींसह जिल्ह्यातील परिस्थितीचा थोडक्यात आढावा सादर केला.

खासदार संजय पाटील यांनी जिल्हा परिषदेत बदल अनिवार्य असल्याची स्पष्ट भूमिका मांडली. प्राजक्ता कोरे यांना अध्यक्षपदी संधी देताना एक वर्षानंतर बदल करण्याचा निर्णय घेण्यात आला होता. शब्द पाळला पाहिजे, बदल केला पाहिजे, पाच नव्या लोकांना संधी मिळेल, आता वेळ करून चालणार नाही, अशी मागणी त्यांनी केली. अन्य सदस्यांनी जिल्हा परिषदेत बदलास कुणाचाही विरोध नाही, मात्र संख्याबळ तपासून, खात्री करूनच निर्णय घ्यावा लागेल, असे स्पष्ट केले. देवेंद्र फडणवीस यांनी आकडेवारी समजून घेतली.

नेमके कोणते सदस्य सोबत राहतील, काँग्रेस, राष्ट्रवादी काँग्रेस काय भूमिका घेईल, याविषयी चाचपणी केली. बदल करायचा असेल तर बहुमत स्पष्ट होईल, याची खात्री करून घ्या. मी स्वतः काही लोकांशी बोलेन आणि मुंबईत बैठक घेऊन त्यावर अंतिम निर्णय घेतला जाईल, असे त्यांनी स्पष्ट केले. जिल्हा परिषदेत अध्यक्ष बदलाचे पाऊल उचलताना संख्याबळ जमते का पाहा. मी स्वतः त्याची पडताळणी करतो. मुंबईत पुढील आठवड्यात बैठक घेऊ आणि मग निर्णय करु, अशी सूचना विरोधी पक्षनेते देवेंद्र फडणवीस यांनी जिल्हा भाजपच्या कोअर कमिटीला दिली.