Manmohan Singh Birthday: एक निर्णय अन् 30 वर्षात कोट्यवधी लोक आले गरिबीतून बाहेर, असं होतं मनमोहन सिंग यांचं अर्थकारण

Happy Birthday Manmohan Singh: देशाचे माजी पंतप्रधान मनमोहन सिंग यांचा आज 91 वा वाढदिवस आहे. 1932 मध्ये याच दिवशी मनमोहन सिंग यांचा जन्म पाकिस्तानच्या पंजाब प्रांतात शीख कुटुंबात झाला. मनमोहन सिंग यांनी देशाची दिशा ठरवण्यात महत्त्वाचे योगदान दिले आहे.

कोणतीही राजकीय पार्श्वभूमी नसलेले मनमोहन सिंग पंतप्रधान झाले. ते दोनदा देशाचे पंतप्रधान राहिले आहेत. त्यांच्या दूरदृष्टीमुळेच भारतासारखा विकसनशील देश विकसित देशांच्या दिशेने एक पाऊल पुढे आला.

डॉ. मनमोहन सिंग यांनी 2004 ते 2014 या काळात यूपीए सरकारमध्ये पंतप्रधान म्हणून काम केले. 1991 मध्ये ते देशाचे अर्थमंत्रीही राहिले आहेत, त्यावेळी नरसिंह राव यांचे सरकार होते. देशातील आर्थिक सुधारणांमध्ये डॉ.मनमोहन यांनी महत्त्वाची भूमिका बजावली.

त्यावेळी अर्थसंकल्प सादर करताना त्यांनी जागतिकीकरण, उदारीकरण आणि खाजगीकरण यांसारख्या महत्त्वाच्या घोषणा केल्या, ज्यामुळे भारतीय अर्थव्यवस्था मजबूत आणि गतिमान झाली आणि या घोषणांमुळे देशातील व्यापार धोरण, औद्योगिक परवाना आणि बँकिंग क्षेत्रात बरीच सुधारणा झाली.

मनमोहन सिंग यांचा राजकीय प्रवास

1991 मध्ये मनमोहन सिंग आसामचे राज्यसभा सदस्य म्हणून निवडून आले. यानंतर ते 1995, 2001, 2007 आणि 2013 मध्ये पुन्हा राज्यसभेचे खासदार होते. 1998 ते 2004 पर्यंत भाजप सत्तेत असताना मनमोहन सिंग हे राज्यसभेत विरोधी पक्षनेते होते.

1999 मध्ये त्यांनी दक्षिण दिल्लीतून निवडणूक लढवली पण त्यांचा पराभव झाला. 2004 मध्ये काँग्रेस सत्तेत येताच त्यांना पंतप्रधान करण्यात आले. 2009 मध्ये काँग्रेस पुन्हा सत्तेवर आली आणि पुन्हा एकदा डॉ. मनमोहन सिंग यांना पंतप्रधान करण्यात आले.

रिझर्व्ह बँकेचे गव्हर्नर

मनमोहन सिंग हे रिझर्व्ह बँकेचे गव्हर्नरही राहिले आहेत. 1982 ते 1985 या आपल्या कार्यकाळात त्यांनी बँकिंग क्षेत्रात सुधारणा करण्यासाठी अनेक कामे केली. मनमोहन यांनी संयुक्त राष्ट्रातही काम केले आहे. 1966-1969 या काळात त्यांनी संयुक्त राष्ट्रांच्या परिषदेसाठी आर्थिक व्यवहार अधिकारी म्हणून काम केले.

30 वर्षात 30 कोटी लोक गरिबीतून बाहेर आले

मनमोहन सिंग यांच्या आर्थिक उदारीकरणाच्या धोरणांनी देशाला गरिबीतून बाहेर काढण्याचे काम केले. या धोरणांमुळे देशातील 30 कोटी लोक गरिबीतून बाहेर आले. त्यानंतर देशात खाजगी क्षेत्राचा विस्तार झाला, त्यामुळे कोट्यावधी नवीन नोकऱ्या निर्माण झाल्या.

तर अनेक बाबतीत आयातीवर अवलंबून असलेला भारत आज जगातील सर्वात मोठ्या सॉफ्टवेअर निर्यातदारांपैकी एक बनला आहे.