सातारा : दक्षिण, उत्तरला वाढले १५ हजार ८०० मतदार

कऱ्हाड : मतदार जनजागृतीसह मतदार नोंदणी कार्यक्रमाची कऱ्हाड उत्तर व दक्षिण विधानसभा मतदारसंघात यशस्वी अंमलबजावणी करण्यात आली. त्याअंतर्गत कऱ्हाड उत्तरमध्ये सहा हजार ७५५, तर दक्षिणमध्ये नऊ हजार ५२ नवीन मतदारांची नोंदणी झाली. त्यात १८ ते १९ वयोगटातील उत्तरमध्ये एक हजार ९९४, तर दक्षिणमध्ये दोन हजार ४६५ मतदारांचा समावेश आहे, अशी माहिती मतदार नोंदणी अधिकारी उत्तम दिघे व सहायक मतदार नोंदणी अधिकारी विजय पवार यांनी दिली.

निवडणूक आयोगाच्या निर्देशानुसार कऱ्हाड उत्तर व कऱ्हाड दक्षिण विधानसभा मतदारसंघातील महाविद्यालयीन नवमतदार, वंचित मतदार, तृतीय पंथी, महिला मतदारांच्या नोंदणीसाठी प्रयत्न झाले. निवडणूक आयोगाच्या व्होटर अॅप व एनव्हीएसपी पोर्टलची माहिती देण्यात आली. अपंग, तृतीयपंथी, शरीर विक्रय करणाऱ्या महिलांसाठी काम करणाऱ्या स्वयंसेवी संस्थाशी संपर्क साधून वंचित मतदारांची नोंदणी करण्यात आली. कार्यक्रमाच्या यशस्वितेसाठी मतदार नोंदणी अधिकारी दिघे व सहायक मतदार नोंदणी अधिकारी पवार यांनी सर्व राजकीय पक्ष, सर्व महाविद्यालयांचे प्राचार्य, सर्व प्रशासकीय कार्यालय प्रमुखांची बैठक घेतली.

दोन्ही विधानसभा मतदारसंघातील सर्व मतदान केंद्रस्तरीय अधिकारी यांचे प्रशिक्षण घेऊन त्यांना निवडणूक आयोगाच्या गरुडा अॅपचे प्रशिक्षण दिले. या कार्यक्रमांतर्गत कऱ्हाड उत्तर व दक्षिण विधानसभा मतदारसंघामध्ये १५ हजार ८०७ मतदार वाढले आहेत. त्यासाठी निवडणूक शाखेतील अधिकारी, कर्मचारी, तलाठी, मंडल अधिकारी, मतदान केंद्रस्तरीय अधिकारी व पर्यवेक्षक यांनी विशेष प्रयत्न केले.

२५ जानेवारीला विविध स्पर्धा

राष्ट्रीय मतदार दिवसाचे औचित्य २५ जानेवारीला महाविद्यालय स्तरावर निबंध, वक्तृत्व, रांगोळी, चित्रकला, भित्तिपत्रक, मीम, गाणे, विडंबन काव्य, घोषवाक्य स्पर्धांचे आयोजन केले आहे. निवडणूक नोंदणीसाठी विशेष प्रयत्न करणारे अधिकारी, कर्मचारी यांचाही पुरस्कार देऊन सत्कार करण्यात येईल, असेही प्रांताधिकारी दिघे यांनी सांगीतले.