सातारा जिल्ह्यात नवे दीड हजार बाधित; कोरोनाबाधितांचा संक्रमण दर २९ टक्के

सातारा : गेल्या तीन दिवसांपासून कोरोनाबाधित संख्येचा आलेख स्थिर असल्याचे दिसत आहे. जिल्ह्यात बाधित संख्येचा संक्रमण दर (Positivity rate) २९ टक्के आहे. दरम्यान, जिल्ह्यात गेल्या चोवीस तासांत एक हजार ५४० बाधित रुग्ण आढळले असून, एका बाधिताचा मृत्यू झाला आहे. (Satara Corona Update)

गेल्या दीड वर्षाहून अधिक काळ कोरोनाशी सामना करत असतानाच आता ओमिक्रॉन प्रादुर्भावाने डोके वर काढले आहे. त्यामुळे प्रशासनाला दुहेरी संकटाशी सामना करावा लागत आहे. याचबरोबर आरोग्य विभाग अधिक सतर्क होत बाधित रुग्णांचा प्रसार रोखण्यासाठी व गैरसोय टाळण्यासाठी तालुकानिहाय कोविड सेंटर सुरू केले आहेत.

कोरोनाचा प्रादुर्भाव वाढत असला तरी जास्तीतजास्त नागरिकांच्या कोरोना चाचण्या करून मृत्यूदर कमी करण्यासाठी प्रशासनाचे प्रयत्न करत आहेत, तसेच हॉटस्पॉट झालेल्या ठिकाणी उपाययोजना आखण्यात भर दिला जात आहे. याचबरोबर जास्तीतजास्त नागरिकांचे लसीकरण केले जात आहे. प्रशासकीय व खासगी कार्यालयांमध्ये नागरिकांनी अनावश्‍यक गर्दी टाळण्याचे आवाहन जिल्हा प्रशासनाने केले आहे. दरम्यान, जिल्ह्यात गेल्या चोवीस तासांत पाच हजार २४५ चाचण्या करण्यात आल्या होत्या. त्यामधील एक हजार ५४० बाधित रुग्ण आढळून आल्याची माहिती आरोग्य विभागाने दिली आहे.