खीर-प्रसाद वाटण्याचा कार्यक्रम; दर्ग्याजवळ डीजेवर लावली कव्वाली अन् निघाले धारदार शस्त्र

नागपूर : एका धार्मिक कार्यक्रमात डीजेवर मोठ्या आवाजात कव्वाली सुरू होती. दरम्यान, आवाज कमी करण्यावरून दोन गटात हाणामारी झाली. आरोपींनी तीन तरुणांवर प्राणघातक हल्ला केला. ही घटना लकडगंज भागात घडली असून पोलिसांनी दोन आरोपींना अटक केली आहे.

पोलिसांनी दिलेल्या माहितीनुसार, शेख फैजान शेख इस्माईल (२४, रा. जुनी मंगळवारी, हत्तीनाला रोड) असे फिर्यादीचे नाव आहे. राईन शेख सलीम शेख, (२०) असे जखमीचे नाव आहे. राकेश रामदास बोरीकर (२७) , सतीश रामदास बोरीकर (३०) अशी अटक करण्यात आलेल्या आरोपींची नावे आहेत. या घटनेत दोन्ही गटाने एकमेकांविरुद्ध पोलिस ठाण्यात तक्रारी दिल्या आहेत. दोन्ही गटाविरुद्ध विविध कलमान्वये गुन्हा दाखल करण्यात आला आहे.

हेही वाचा - सावधान! पायी जाणाऱ्या मुलींनो, जरा सांभाळून..काय आहे प्रकरण... वाचा सविस्तर

मंगळवारी सायंकाळी पाच वाजताच्या सुमारास तक्रारदार शेख फैजान शेख इस्माईल व मित्र समीर अली शौकत अली (१९) , कुणाल टाकळीकर (१९) आणि राईन यांनी त्यांच्या मोहल्यातील धार्मिक स्थळावर खिर-प्रसाद वाटण्याचा कार्यक्रम ठेवला होता.

यादरम्यान त्यांनी दर्ग्याजवळ डीजेवर कव्वाली गाणे वाजविले. त्यावेळी राकेश व सतीश यांनी आवाज कमी करण्यास सांगितले. यावरून आरोपींनी शिवीगाळ करून लोखंडी रॉड व लाकडी दंडा व फावड्याने फैजानचा मित्र राईनच्या डोक्यावर हल्ला करून गंभीर जखमी केले.

अधिक माहितीसाठी - जिच्या काठावर वसले आहे अख्खे नागपूर त्या 'नाग नदीचा' इतिहास माहिती आहे का? नाही ना. मग जाणून घ्या

तसेच यांच्या दोन मित्रांच्या हातावर पायावर मारून जखमी केले. राईनला मेयो हॉस्पिटलमध्ये दाखल करण्यात आले आहे. तक्रारीवरून लकडगंज पोलिसांनी आरोपींविरुद्ध कलम ३२६, ५०४, ३४ भादंवि अन्वये गुन्हा नोंदवून आरोपींना अटक केली आहे. दरम्यान दुसरी तक्रार आरोपींची आई छाया रामदास बोरीकर (५०, रा. कवडूजी पाटील आखाड्याजवळ, जुनी मंगळवारी) यांनी फैजान व इतर पाच ते सहा आरोपींविरुद्ध दिली आहे.

संपादन - नीलेश डाखोरे