‘तो मुलींच्या आयुष्याशी खेळतो, बदनामी करतो’; गळफास लावलेल्या अल्पवयीन मुलीच्या हातात होती सुसाईट नोट

नागपूर : ‘मी अमरवर प्रेम केले, पण त्याने मला धोका दिला. तो माझा गुन्हेगार आहे. तो मुलींच्या आयुष्याशी खेळतो. मुलींची बदनामी करतो’ अशी सुसाईड नोट लिहून अल्पवयीन मुलीने गळफास लावून आत्महत्या केली. ही धक्कादायक घटना काटोल तालुक्यातील ताराबोडी येथे नुकतीच उघडकीस आली. याप्रकरणी मुलीच्या वडिलांच्या तक्रारीवरून पोलिसांनी प्रियकराविरुद्ध आत्महत्येस प्रवृत्त केल्याचा गुन्हा दाखल केला आहे.

पोलिसांनी दिलेल्या माहितीनुसार, अमर गदाई (२०, रा. म्हसेपठार, मोहपा, ता. कळमेश्वर) असे आरोपीचे नाव आहे. अमर व अल्पवयीन मुलीचे प्रेमसंबंध होते. अल्पवयीन मुलगी मेटपांजरा येथील एका महाविद्यालयात इयत्ता बारावीचे शिक्षण घेत होती. ६ जानेवरी २०२१ रोजी मोहपा जवळच्या म्हसेपठार येथील एका नातेवाईकाच्या विवाह सोहळ्यात सहभागी होण्यासाठी सहकुटुंब ती आली होती.

नक्की वाचा - याला म्हणतात विश्वास! सदस्यांनी नाकारले, पण गावकऱ्यांनी स्वीकारले अन् पद जाता-जाता वाचले

येथे आरोपी अमर गदाई हा देखील आला होता. तेथून घरी परतल्यानंतर २५ जानेवारीला मुलीने ‘अमर हा त्याच्यासोबत पळून चलण्यास म्हणतो आहे. जर ती गेली नाही तर अश्लील फोटो व्हॉट्स ॲप करील’ अशी धमकी देत असल्याचे वडिलांना सांगितले होते. त्यावर वडिलांनी मुलीला समजावून शांत राहण्यास सांगितले होते.

दोन दिवसांनी मरगसूर येथील भवानी मंदिरात असलेल्या कार्यक्रमात अमरला मुलीच्या वडिलांनी समजावून सांगितले. त्यानंतर तेथून तो निघून गेला. दोन दिवसानंतर घरी कुणीही नसल्याचे हेरून मुलीने साडीच्या सहायाने गळफास लावून जीवनयात्रा संपवली. घटनेची माहिती कुटुंबीयांना मिळाताच घराकडे धाव घेऊन तिला फासावरून उतरविले.

यावेळी तिच्या हातात स्व:हस्ताक्षरातील सुसाईड नोट आढळून आली. या नोटमध्ये ‘मी अमरवर प्रेम केले, पण त्याने मला धोका दिला. तो माझा गुन्हेगार आहे. तो मुलींच्या आयुष्याशी खेळतो, मुलींची बदनामी करतो’ असे लिहलेले होते. यानंतर कुटुंबीयांनी घटनेची माहिती काटोल पोलिसांना दिली.

जाणून घ्या - नशीब लागतंय राव! ईश्वरचिठ्ठीने निवडून आली महिला अन् आता होणार सरपंच

पोलिसांनी घटनास्थळ गाठून पंचनामा केला व मृतदेह शासकीय रुग्णालयात उत्तरीय तपासणीसाठी पाठविला. मुलीच्या वडिलांच्या तक्ररीवरून व सुसाईड नोटवरून आरोपी विरोधात आत्महत्येस प्रवृत्त केल्याबद्दल गुन्हा दाखल करण्यात आला आहे.