IIT Success Story : भाजीविक्री,हॉटेलमध्ये काम अन् आता बनणार आयआयटीयन ; भाजी विक्रेत्याच्या मुलाची यशोगाथा

Yavatmal : देशात अत्यंत कठीण समजली जाणारी तसेच आयआयटी करिता आवश्यक असलेली जेईई अ‍ॅडव्हान्स परीक्षा यवतमाळच्या एका भाजी विक्रेत्याच्या मुलाने पास केली आहे आणि आपल्या आईवडिलांचे स्वप्न पूर्ण केले आहे. रुद्राक्ष गायकवाड असे त्याचे नाव असून त्याचे वडील संतोष हे यवतमाळ शहरात भाजीचा व्यवसाय करतात.

असं म्हणतात, की माणूस दृढनिश्चयी असेल तर तो काहीही करू शकतो. परिस्थिती कितीही बिकट असली तरी तो आपली यशोगाथा घडवतो. गरिबी माणसाच धैर्य तोडू शकत नाही. ज्यांची ध्येयं मजबूत असतात ते कोणत्याही परिस्थितीत यशस्वी होण्याचा मार्ग शोधतात.

संतोष गायकवाड हे गेल्या अनेक वर्षांपासून यवतमाळात भाजीचा व्यवसाय करतात. अत्यंत हलाखीची परिस्थिती असल्यामुळे संतोष यांना लहान वयात हॉटेलमध्ये काम करावे लागले.

अत्यंत संघर्षमय जीवन जगत असल्यामुळे इच्छा असतानाही त्यांना चांगले शिक्षण घेता आले नाही. ते चौथी पास आहेत. विशेष म्हणजे गायकवाड यांच्या घराण्यात इयत्ता दहावीसुद्धा कुणी पास नाही. मात्र, संतोष यांनी भाजीचा व्यवसाय करीत पोटाला चिमटा घेत आपली मुले घडवली.

त्यांची मोठी मुलगी नागपूर येथे शासकीय दंत चिकित्सामध्ये वैद्यकीय शिक्षण घेत आहे. तर रुद्राक्षने मिळालेल्या संधीचे सोने करीत जेईई अ‍ॅडव्हान्स यशस्वीरीत्या पार केली आहे.रुद्राक्ष आपल्या यशाचे श्रेय वडील संतोष,आई छाया तसेच बहीण डॉ. धनश्री, काका सतीश यांना देतो.