Jalgaon Unseasonal Rain Damage: बोदवडला वादळी तडाखा! पिकांसह घरांचे नुकसान; जलचक्र परिसरात घरांचे, शाळेचे पत्रे उडाली

बोदवड : शहरासह तालुक्यात मंगळवारी (ता. ९) दुपारी चारच्या सुमारास वादळी वाऱ्यासह आलेल्या पावसामुळे मोठे नुकसान झाले आहे. शहरात जय मातादी जीनिंग प्रेसिंगचे शेड उडाल्याने दीड हजार क्विंटल कपाशी, तर हजार, बाराशे क्विंटल सरकीचे नुकसान झाले. तसेच जलचक्र परिसरातही वादळी तडाखा बसला आहे.

येथे जिल्हा परिषद शाळेचे सर्व पत्रे उडाली. तसेच शहरात अण्णा भाऊ साठेनगरमध्ये अनेकांच्या घरांवरील पत्रे उडाली, भिंती कोसळल्या असून, घरांसह शेतीचेही मोठे नुकसान झाले आहे. (Jalgaon Unseasonal Rain Damage Thunderstorm hits Bodwad news)

जलचक्र बुद्रूक, खुर्द व जलचक्र तांडा येथे वादळी वाऱ्यामुळे गावात खूप नुकसान झाले आहे. गावात झाडे व वीजखांब तुटलेले आहेत. दिनकर ठाकरे, दामू शिराळे, आनंद सुरवाडे, सतीश पाटील, बेबाबाई खराटे, राजू पाटील, सतीश ठाकरे, सुशील पाटील, विठ्ठल पाटील यांच्या घरांवरील पत्रे उडून घराच्या भिंतीचे नुकसान झाले आहे.

तसेच विनोद सपकाळ, सुरेश सपकाळ आणि गणेश सपकाळ, सरला पाटील यांचे तीळ पीक, नलिनीबाई पाटील यांची ज्वारी, साहेबराव पाटील (जलचक्र) व निंबाजी बावस्कर यांचे ज्वारी पिकांसह अनेक शेतकऱ्यांचे पिकांचे नुकसान झाले आहे. त्याचप्रमाणे ऐणगाव येथे घरांच्या नुकसानासह विनोद कोळी यांचा मका, ज्वारी, जुनोना येथे केळीबाग यांसह इतरही ठिकाणी कमी-अधिक प्रमाणात नुकसान झाले आहे.  (latest marathi news)

वीज कोसळल्याने कापूस जळाला

हरणखेड येथे प्रफुल्ल वराडे याची पंधरा ते २० क्विंटल कपाशी वीज कोसळल्याने जळाली. यांसह मका, ज्वारी पिकांचे मोठे नुकसान झाले आहे. दरम्यान, शहरासह ग्रामीण भागात अनेक ठिकाणी विजेचे खांब वाकल्याने व वीजतारा तुटल्याने वीजपुरवठा खंडित झाला होता.

आता वीजतारा जोडून वीजपुरवठा सुरळीत करण्याचे आव्हान ‘महावितरण’समोर आहे. या अस्मानी संकटामुळे झालेल्या नुकसानाची पाहणी तहसीलदार अनिल वाणी यांनी केली व बुधवारी पंचनामे करण्यात येतील, असे सांगितले.