'राज्यसरकारचे नेते पवारांच्या ताटाखालचे मांजर झालेले मंत्री'

राज्याच्या हिवाळी अधिवेशनाचा आज दुसरा दिवस आहे. विविध विषयांवरून आजही विरोधक आक्रमक झाले आहेत. टीईटी, म्हाडा, आरोग्य विभागाच्या भरती घोटाळ्यावरून विरोधकांनी आक्रमक पवित्रा घेतला आहे. दरम्यान, केंद्राच्या नावाने ओरड करायचा प्रयत्न केला ही दुर्दैवी गोष्ट आहे असं म्हणत पडळकरांनी सत्ताधाऱ्यांना धारेवर धरलं आहे. शेतकऱ्यांना येणाऱ्या भरमसाठ बिलाविरोधात आज विधान परिषदेत विरोधक आक्रमक झाले. विरोधकांनी सभात्याग करत सरकारवर टीका केली आहे.

यावेळी पडळकर म्हणाले, सदाभाऊ खोत यांनी वीज बिलाबाबत लक्षवेधी बाजू मांडली. ती चुकीची बिले आधी तुम्ही दुरुस्त करा, मग आम्ही बिल भरू. पण राज्य सरकारकडे याबद्दल उत्तर नाही त्यांनी पुन्हा हा विषय केंद्राकडे ढकलला आहे. ज्याला तुम्ही कनेक्शन दिलं नाही, त्याला बिल देता आणि मग तुम्ही सांगता 60 हजार कोटी बिल थकीत आहे. हे सर्व सत्ताधारी नेते पवारांच्या ताटाखालची मांजर झालेले मंत्री आहेत, असा गंभीर आरोप त्यांनी केला आहे.

दरम्यान, बुलढाण्याच्या एका शेतकऱ्यानं २० वर्षापूर्वी अर्ज केला. आजही त्याला कनेक्शन मिळालं नाही. ६ डिसेंबर २०२१ ला त्याला वीजबील दिलंय. शिवाय दुसऱ्या एका शेतकऱ्याच्या मोटारी बंद असूनही त्याला भलं मोठं बिल दिलं आहे. जर तुम्ही अशी बोगस बिलं दिली असतील तर तुम्ही खात्याला बिलं दुरुस्त होणार नाही तोपर्यंत वीज कनेक्शन तोडणार नाही याचे आदेश देणार का? तोडलेले कनेकश्न जोडण्याचे आदेश देणार का? बिल दुरुस्तीचे कँप घेणार का? डीपीचा लोड कमी जास्त होतोय ते तुम्ही सुरळीत होणार का? असे प्रश्न पडळकरांनी विचारले आहेत.