लता मंगेशकर यांना भेटण्यास कुणालाही परवानगी नाही; डॉक्टरांनी दिली माहिती

मुंबई - गानसम्राज्ञी लता मंगेशकर (Lata Mangeshkar) या गेल्या आठवड्याभरापासून रुग्णालयात आहेत. गेल्या शनिवारी त्यांची कोरोना (Corona) चाचणी पॉझिटिव्ह आल्यानंतर मुंबईतील (Mumbai) ब्रीच कँडी रुग्णालयात दाखल करण्यात आलं होतं. आता डॉक्टरांकडून त्यांच्या प्रकृतीबद्दल माहिती देण्यात आली आहे. वयोमानानुसार त्यांची काळजी घेण्याची गरज असल्यानंच त्यांच्यावर रुग्णालयात उपचार सुरु आहेत. लता मंगेशकर यांच्यावर ब्रीच कँडीमध्ये आय़सीयुत डॉक्टरांच्या देखरेखीखाली उपचार केले जात आहेत.

लता मंगेशकर यांच्यावर उपचार करणारे डॉक्टर प्रतित सामदानी यांनी दिलेल्या माहितीनुसार, लता मंगेशकर यांची काळजी घेण्याची आवश्यकता आहे. त्यामुळेच डॉक्टरांच्या देखरेखीखाली त्यांच्यावर आणखी काही दिवस उपचार करण्यात येतील. त्यांची प्रकृती आधीप्रमाणेच स्थिर आहे. कोणालाही त्यांना भेटण्याची परवानगी नाही असेही डॉक्टरांनी सांगितले आहे.

प्रकृती स्थिर असली तरी त्यांना कोविड न्युमोनिया झाल्यामुळे त्यांना डॉक्टरांच्या निगराणीखाली आणखी काही दिवस ठेवण्यात येणार असल्याची माहिती मिळते. लता दीदी लवकर कोरोना मुक्त होवोत आणि सुदृढ घरी परत येवोत अशी प्रार्थना चाहते करत आहेत. तसंच लता मंगेशकर यांच्या कुटुंबियांनी चाहत्यांसह सर्वांनाच कुटुंबाची प्रायव्हसी जपण्याचं आवाहन केलं आहे.