लता मंगेशकरांना घरातील 'या' व्यक्तीमुळे झाली कोरोनाची लागण

गानसम्राज्ञी लता मंगेशकर(Lata Mangeshkar) यांचं वय आज ९२ वर्षे आहे. आज वयोपरत्वे त्या फारशा अॅक्टिव्ह नसल्या तरी त्यांनी संगीतक्षेत्रात करून ठेवलेली कामगिरी त्यांच्या चाहत्यांसाठी एक मोठं गिफ्टच आहे असं म्हणावं लागेल. वयाची नव्वदी गाठत असताना त्यांनी आपले धाकटे बंधू ज्येष्ठ संगीतकार ह्दयनाथ मंगेशकर यांच्यासाठी गाणं गायलं होतं. तोच गोडवा,मधाळपणा त्या गाण्यातनं रसिकांनी एन्जॉय केला होता,शेवटी दैवी देणगी. पण त्यानंतर लता दीदींनी गाणं थांबवलं. गेल्या दोन वर्षात तर त्या कुठे बाहेर पडलेल्या दिसल्या नाहीत. मंगेशकर कुटुंबातर्फे जो 'दिनानाथ मंगेशकर पुरस्कार' जाहीर होतो त्याच्या पत्रकार परिषदेत तरी त्यांची उपस्थिती असायचीच. पण यावेळी कोरोनामुळे त्या उपस्थित राहिल्या नाहीत. आणि अशातच त्यांना कोरोनाची लागण झाली ही बातमी आल्यानं हे कसं शक्य आहे यावर अनेक प्रश्न निर्माण केले गेले.

लता मंगेशकर पेडर रोडला रस्त्याला लागून असलेल्या एका आलिशान इमारतीत पहिल्या मजल्यावर राहतात. त्यांच्या घरी त्यांच्यासोबत बहिण उषा मंगेशकरही राहतात. तसंच अनेक कर्मचाऱ्यांचा राबता त्यांच्या घरी असतो. लता मंगेशकर यांची काळजी घ्यायला तर एक मावशी कायम त्यांच्यासोबत असतात. ज्या प्रत्येक गोष्टीत लता दीदींची काळजी घेत असतात. तसेच घरात भाजी आणणे,इतर सामानांची खरेदी-विक्री करण्यासाठी अन्य कर्मचारी ये-जा करतात ते वेगळे. आता बातमी येत आहे की दोन वर्ष घरातून बाहेरही न पडलेल्या किंवा कोणाच्याही फार संपर्कात न येऊनही लता दीदींना कोरोनाची लागण ही त्यांच्याच घरात ये-जा करणा-या कर्मचाऱ्यांमुळे झाल्याचं बोललं जातंय. त्या कर्मचाऱ्याची कोरोना चाचणी केली असता ती पॉझीटिव्ह आल्याचं बोललं जातंय.

लता दीदींवर मुंबईतील ब्रीजकॅंडी इस्पितळात उपचार सुरू आहेत. त्यांची प्रकृती स्थिर असली तरी त्यांना कोविड न्युमोनिया झाल्यामुळे त्यांना डॉक्टरांच्या निगराणीखाली आणखी काही दिवस ठेवण्यात येणार असल्याचं बोललं जातंय. ब्रीजकॅंडी इस्पितळात डॉ. प्रतित समदानी आणि त्यांची टीम लता दीदींवर उपचार करत आहेत. लता दीदी लवकर कोरोना मुक्त होवोत आणि सुदृढ घरी परत येवो या शुभेच्छा.