विल स्मिथ थप्पड प्रकरणात कंगनाची उडी; म्हणाली, 'मी असते तर...'

काल ऑस्करच्या (Oscars Awards 2022) 94 व्या अकादमी पुरस्कारांचे वितरण करण्यात आले. या पुरस्कार सोहळ्यामध्ये हॉलिवूडमधील प्रसिद्ध अभिनेता विल स्मिथला (Will Smith) ऑस्कर पुरस्कारानं गौरवण्यात आलं. मात्र, हा सोहळा गाजला आहे तो वेगळ्याच कारणांनी... या सोहळ्याचे निवेदन करणारा कॉमेडियन ख्रिस रॉक याला अभिनेता विल स्मिथने (Will Smith) मंचावर जाऊन थप्पड मारली होती. काल दिवसभरात याच घटनेवर अधिक चर्चा झाली असून आजही तिच्यावर प्रतिक्रिया येत आहेत. विल स्मिथने ख्रिस रॉकची माफी मागणारी पोस्ट टाकली असली तरी कंगनाने आता यावर आपलं मत मांडत विलला पाठिंबा दिला आहे. (Kangana Ranaut Support Will Smith)

काय म्हणाली कंगना?

यासंदर्भात आता कंगना रणौत हिने आपलं मत मांडलं आहे. तिने इन्स्टाग्रामवर विल स्मिथ आणि क्रिस रॉक यांचा फोटो शेअर करून कॅप्शनमध्ये लिहिलंय की, 'जर एखादा मूर्ख माणूस लोकांना हसवण्यासाठी माझ्या आई किंवा बहिणीबद्दल अशी चेष्टा करत असेल तर मी देखील तेच करेन जे स्मिथनं केलंय. '

'किंग रिचर्ड्स' चित्रपटासाठी विल स्मिथला ऑस्कर मिळाला आहे. मात्र, या थप्पडीचा ख्रिस रॉकला (Chris Rock) फायदाच झाला असल्याचं दिसून येतंय कारण, त्याचा आगामी कॉमेडी शो सध्या तुफान हाऊसफुल्ल झाला आहे. त्याच्या आगामी स्टँड-अप शोसाठीच्या तिकीट विक्रीमध्ये विक्रमी वाढ होत आहे.

काल सोहळ्यात नेमकं काय घडलं?

विल स्मिथला यावर्षी ‘किंग रिचर्ड’साठी नामांकन मिळाले होते. या चित्रपटासाठी त्याला सर्वोत्कृष्ट अभिनेत्याचा ऑस्कर पुरस्कार मिळाला आहे. क्रिस रॉक सर्वोत्कृष्ट माहितीपटाचा पुरस्कार सादर करण्यासाठी मंचावर आला होता. त्यावेळी त्याने विल स्मिथच्या पत्नीवर एक विनोद केला. त्यानंतर विल स्मिथने स्टेजवर जाऊन त्याला कानाखाली मारल्याचं दिसून आलं. कॉमेडियन क्रिसने विल स्मिथची पत्नी जॅडाच्या आजारपणाची खिल्ली उडवली होती, जी त्याला आवडली नाही. मात्र, त्यानंतर विल स्मिथने घडल्या प्रकाराबद्दल माफी मागितली आहे.