Satej Patil : लोकसभेच्या तोंडावर आमदार सतेज पाटलांनी घेतली स्वाती कोरींची भेट; राजकीय चर्चांना उधाण

गडहिंग्लज : आमदार सतेज पाटील (Satej Patil) यांनी काल येथील जनता दलाच्या नेत्या स्वाती कोरी (Janata Dal leader Swati Kori) यांची त्यांच्या निवासस्थानी भेट घेतली. ताई...फक्त तुम्ही आमच्या सोबत राहा, आम्ही तुम्हाला ताकद देऊ, असे आवाहन पाटील यांनी कोरी यांना केले. लोकसभा निवडणुकीच्या पार्श्वभूमीवर पाटील गडहिंग्लज दौऱ्यावर होते. सायंकाळी त्यांनी कोरी यांची भेट घेतली.

पाटील यांनी, आजची परिस्थिती पाहता माजी आमदार शिंदे यांच्या विचारांनेच पुढे जाण्याची गरज आहे. भाजपसोबत (BJP) न जाण्याचा जनता दलाचा निर्णय म्हणजे शिंदेंच्या विचारांना आणखी बळ मिळाले आहे. आपणाला भविष्यात राजकारणात मोठी संधी आहे.

येत्या निवडणुकीत महाविकास आघाडीसोबत (Mahavikas Aghadi) आपण राहिल्यास बळ मिळेल. त्यावर कोरी यांनी कार्यकर्त्यांशी चर्चा करून निर्णय कळविला जाईल, अशी ग्वाही दिल्याचे सांगण्यात आले. ऊर्मिलादेवी शिंदे, माजी उपनगराध्यक्ष महेश कोरी, सुनील शिंदे आदी उपस्थित होते.

निवडणुका एकत्रितपणे लढण्‍याचा प्रस्ताव

यावेळी राजकीय वाटचालीचीही पाटील यांनी चर्चा केली. ग्रामपंचायत, नगरपालिकेपासून लोकसभेपर्यंतच्या सर्वच निवडणुकीत काँग्रेस व जनता दलासोबत राहून काम करू. तसेच तालुक्यात सर्व स्थानिक स्वराज संस्थांच्या निवडणुका एकत्रितपणे लढू, असा प्रस्ताव पाटील यांनी कोरी यांना दिल्याचे समजते. त्यावरही कोरी यांनी पक्षाच्या प्रमुखांसह कार्यकर्त्यांशी चर्चा करू, असे सांगितल्याचे कळते.