Indian Idol: "सिझन ११ मध्ये सर्वकाही फेक होतं"; अभिजीत सावंतचा खुलासा

'इंडियन आयडॉल १२' Indian Idol 12 हा गाण्यांचा रिअॅलिटी शो सध्या फार चर्चेत आहे. स्पर्धकांच्या गायनकौशल्यापेक्षा शोवर होणारे आरोप, दिग्गज गायकांनी केलेली टीका यांमुळे या शोची चर्चा होत आहे. २००५ मध्ये या रिअॅलिटी शोचा पहिला सिझन प्रेक्षकांच्या भेटीला आला होता. या सिझनचा विजेता अभिजीत सावंत Abhijeet Sawant यानेसुद्धा आता शोवर टीका केली आहे. गाण्यांपेक्षा इतर गोष्टींवरच जास्त भर दिला जातो, असं त्याने नुकत्याच दिलेल्या एका मुलाखतीत म्हटलंय. (Abhijeet Sawant opens up about Indian Idol 12 controversies says everything was fake )

'बॉलिवूड लाइफ'ला दिलेल्या मुलाखतीत अभिजीत म्हणाला, "कार्यक्रमात गाण्यांव्यतिरिक्त जे काही दाखवलं जातं, त्याची मर्यादा आमच्या सिझनमध्ये फार कमी होती. पण सध्याच्या सिझनमध्ये त्याच एक्स्ट्रा एलिमेंट्सना जास्त महत्त्व दिलं जातंय. त्यांनी स्पर्धकांना आव्हानात्मक काम दिलं पाहिजे. पण जेव्हा तुम्ही गाण्यांव्यतिरिक्त इतर गोष्टींवर अधिक भर देता, तेव्हा गायनाचा दर्जा खालावत जातो. अशा रिअॅलिटी शोमध्ये गायनावर अधिक भर दिला पाहिजे."

या शोमध्ये दाखवल्या जाणाऱ्या अफेअर्सबद्दल अभिजीत व्यक्त झाला. "या सिझनबद्दल मला फारसं माहित नाही पण इंडियन आयडॉलच्या सिझन ११ मध्ये दाखवलेले अफेअर्स फेक होते. गायन आणि अशा गोष्टींमध्ये संतुलन असणं गरजेचं असतं. गायनामुळे स्पर्धकांची खरी ओळख ठरते, अशा खोट्या कथांमुळे नाही", असं तो म्हणाला. अकराव्या सिझनमध्ये सूत्रसंचालक आदित्य नारायण आणि परीक्षकाच्या भूमिकेत असलेली गायका नेहा कक्कर यांचं अफेअर असल्याचं दाखवण्यात आलं होतं. मात्र हे सर्व फक्त पब्लिसिटी स्टंट असल्याचं नंतर स्पष्ट झालं.

प्रसिद्ध गायिका सुनिधी चौहाननेही या शोवर टीका केली होती. 'स्पर्धकांचं कौतुक करा, त्यांची प्रशंसा करा, असं मला निर्मात्यांकडून सांगण्यात आलं होतं. मला हे न पटल्याने मी त्या शोला नकार दिला', असं ती म्हणाली.