सोनई (जि.अहमदनगर) : जलसंधारणमंत्री शंकरराव गडाख (shankarrao gadakh) कार्यक्रमानिमित्त रस्त्याने जात असताना शिंगवे तुकाई (ता. नेवासे) येथील पाच एकर लालबुंद डाळिंबाच्या बागेने त्यांना जणू हाक दिली. सर्व लवाजमा थेट शेताच्या बांधावर गेला. गाठीभेटी व इतर कार्यक्रमानिमित्त आज शनिवारी गडाख शिंगवे तुकाई भागात होते. कमी पाणी असतानाही प्रयोगशील शेतकरी बापूसाहेब पवार यांनी अतिशय कष्टातून पाच एकर डाळिंबाचे पीक बहरून दाखविले आहे. बागेत आलेल्या जलसंधारणमंत्री गडाखांचे वरद व संभाजी पवार यांनी स्वागत केले.

यावेळी माजी सरपंच योगेश होंडे, गंगाधर विधाटे, शिवाजी पुंड, श्रीकांत पवार व परिसरातील शेतकरी उपस्थित होते. गडाख यांनी डाळिंब पिकाची जात, फळे धरण्याचा हंगाम, दिल्या जाणाऱ्या फवारण्या, वेळोवेळी केली जाणारी झाडांची छाटणी, पाणी व्यवस्थापन, तण नियंत्रण आदी विषयी शेतकरी पवार यांच्याशी चर्चा केली. इतर शेतकऱ्यांशी संवाद साधून अडचणी जाणून घेतल्या. पवार परिवाराने लालबुंद डाळिंबाचा दिलेला वानवळा गडाखांनी आनंदाने स्वीकारला.