श्रीरामपूर (जि. नगर) : तालुक्यातील बेलापूर येथील अल्पवयीन मुलीचे एका तरुणाने अपहरण केल्याच्या निषेधार्थ आज (सोमवारी) श्रीरामपूरसह बेलापुरात ‘बंद’ पाळण्यात आला. अपहरणाची घटना घडून अनेक दिवस उलटूनही तपास लागला नसल्याने, हिंदुत्ववादी संघटनांनी ‘बंद’चे आवाहन केले होते.

बंदमुळे शहरातील मुख्य बाजारपेठेसह बेलापूर गावातील दुकाने आज दिवसभर बंद होती. या घटनेसंदर्भात हिंदुत्ववादी संघटनांनी पोलिस ठाण्यासमोर मोर्चा व बेलापुरात रास्ता रोको आंदोलन केले होते. त्यानंतर आज पुन्हा ‘बंद’ पाळण्यात आला. एका तरुणाने अल्पवयीन मुलीला पळवून नेल्याची घटना घडली. याला सुमारे २० दिवस उलटूनही पोलिसांना आरोपीचा तपास लागत नसल्याच्या निषेधार्थ शिवप्रहार प्रतिष्ठानच्या नेतृत्वाखाली आज बंद पाळण्यात आला. आज सकाळपासून शहरातील मेन रोड, शिवाजी रोड, नेवासे रोड, तसेच संगमनेर रस्त्यावरील दुकाने बंद होती. शहरातील मेन रोडवरील मुख्य बाजारपेठेसह सोनार लेनमधील दुकाने बंद होती.

अपर पोलिस अधीक्षक डॉ. दीपाली काळे, पोलिस उपअधीक्षक संदीप मिटके यांच्या मार्गदर्शनाखाली पोलिस निरीक्षक संजय सानप यांच्या पथकाने श्रीरामपूरसह बेलापुरात बंदोबस्त ठेवला होता.