संगमनेर : संगमनेरहून आश्वी खुर्दकडे येणाऱ्या चालत्या कारला अचानक आग ल्यागल्याने, झालेल्या दुर्घटनेत कारची हानी झाली. ही घटना संगमनेर शिबलापूर मार्गावर रात्री (ता.19) आठच्या सुमारास तालुक्यातील शिबलापूर शिवारातील गोसावी फाटा परिसरात घडली.

उपसरपंचांच्या गाडीने घेतला पेट! संगमनेर-शिबलापूर मार्गावर ‘द बर्निंग कारचा’ थरार

याबाबत अधिक माहिती अशी, आश्वी खुर्दचे उपसरपंच सुनिल तुकाराम मांढरे व उमेश गाढे संगमनेहून गावाकडे परतत होते. त्यावेळी गोसावी फाटा परिसरात यांच्या कारमधून (एमएच 05 एजे. 7714) च्या इंजिनमधून ठिणग्या बाहेर पडून अचानक धुर येऊ लागला. त्यामुळे कार थांबवून त्यांनी काय झाले असावे याची पाहणी करीत असतानाच, अचानक आगीच्या ज्वाला उठून, त्यात कारने पेट घेतला. वाहनातील इंधन, फोम व रेक्झीनचे सीट आदी ज्वलनशिल वस्तूंमुळे ही आग भडकली. दोघेही या वेळी कार बाहेर असल्याने सुदैवाने बचावले. घटनेची माहिती मिळताच संगमनेर नगरपरिषदेच्या अग्निशामक दलाचा बंब घटनास्थळी दाखल होवून त्याने आग विझवली. मात्र तो पर्यंत आगीत कार जळून खाक झाली होती. याबाबत मांढरे यांनी आश्वी पोलिस ठाण्यात झालेल्या घटनेबाबत माहिती देत नोंद केली आहे.