तिसगाव (जि.अहमदनगर) : उसाच्या शेतात लपवून ठेवलेला ७२१ किलो (किंमत ५७ लाख) गांजा साठ्यावर पोलिसांनी छापा टाकला. शेवगावचे विभागाचे पोलिस उपअधीक्षक सुदर्शन मुंडे यांच्या मार्गदर्शनाखाली पाथर्डी, सोनई व शनिशिंगणापूर पोलिसांनी रविवारी (ता.२९) पाथर्डी तालुक्‍यातील मिरी परिसरातील शंकरवाडीमध्ये ही कारवाई केली. दोन महिलांना अटक करण्यात आले आहे.

गुप्त बातमीदाराकडून मिळाली माहिती

पाथर्डी तालुक्‍यातील मिरी परिसरातील शंकरवाडी येथील बापू आव्हाड, साहेबराव आव्हाड, गोरख आव्हाड, विलास आव्हाड यांनी उसाच्या शेतात मोठ्या प्रमाणावर गांजा लपविला असल्याची माहिती गुप्त बातमीदारकडून मिळाली. शेवगावचे उपअधीक्षक सुदर्शन मुंडे यांनी रविवारी सकाळी मोठ्या पोलिस पथकाच्या ताफ्यासह छापा टाकला. या शेतात आरोपी सुमन साहेबराव आव्हाड (वय ४०) आणि सावित्राबाई बापू आव्हाड (वय ६५, रा. शंकरवाडी, ता. पाथर्डी) या आढळून आल्या. त्यांच्या ताब्यातून ७२१.१४२ किलो ग्रॅम वजनाचा अंदाजे ५७ लाख ६९ हजार १३६ रुपयांचा गांज्याचा साठा आढळून आला. त्यांच्याकडे चौकशी केली असता, सदरचा गांजा हा आरोपी नारायण भालके (पूर्ण नाव माहित नाही) आणि बाळासाहेब उर्फ बबन दहातोंडे (पूर्ण नाव नाही, दोघे रा. चांदा, ता. नेवासे) यांचा असल्याचे सांगितले. बापू आव्हाड, साहेबराव आव्हाड, गोरख आव्हाड, विलास आव्हाड यांना राखण करण्यासाठी दिला असल्याचे सांगितले. या प्रकरणी पाथर्डी पोलिस ठाण्यात गुन्हा दाखल करण्यात आला आहे.

पाथर्डीचे पोलिस निरीक्षक सुहास चव्हाण, सहाय्यक पोलिस निरीक्षक रामेश्‍वर कायंदे, सोनईचे सहाय्यक पोलिस निरीक्षक ज्ञानेश्‍वर थोरात, शनिशिंगणापूरचे सहाय्यक पोलिस निरीक्षक सचिन बागूल यांच्यासह पोलिस कर्मचारी भगवान सानप, देविदास तांदळे, अनिल बडे, पोपट आव्हाड, एकनाथ बुधवंत, प्रतिभा नागरे यांचा या पथकात समावेश होता.