संगमनेर : तालुक्यातील कनोली येथे 29 वर्षे वयाच्या वराशी अल्पवयीन मुलीचे लग्न लावल्याप्रकरणी, बालविवाह प्रतिबंध अधिनियम 2007 चे कलम 9,10 प्रमाणे संगमनेर पोलीस ठाण्यात चार आरोपी विरोधात गुन्हा दाखल झाला आहे.

या बाबत पोलीसांनी दिलेल्या माहितीनुसार 15 वर्षे 8 महिने 14 दिवस या वयाच्या मुलीचे कायद्याने लग्नाचे वय पूर्ण नाही हे माहिती असतानाही श्रीरामपूर तालुक्यातील एका अल्पवयीन मुलीचा विवाह मंगळवार( 2 मे) रोजी तालुक्यातील कनोली येथे आरोपीच्या घरासमोर संगनमताने लावून देण्यात आला.

याबाबत माहिती समजल्यानंतर ग्रामसेवक रवींद्र केशव शिंदे वय 38 रा.हनुमंतगाव (राहाता ) यांनी अल्पवयीन मुलीचा जन्मदाखला व आधार कार्ड वरील जन्मतारखेची खात्री व चौकशी केली. त्यानंतर याबाबत आरोपी प्रवीण पोपट वर्पे (नवरदेव वय 29) पोपट एकनाथ वर्पे, रंजना पोपट वर्पे तिघेही राहणार कनोली ता. संगमनेर व पीडित मुलीची आई या चार जनांविरोधात अल्पवयीन मुलीचे लग्न लावून देऊन बाल विवाह प्रतिबंध अधिनियमाचा भंग केल्याचा गुन्हा दाखल केला आहे.

पुढील तपास पोलीस निरीक्षक देविदास ढूमने यांच्या मार्गदर्शनाखाली उपनिरीक्षक राजेंद्र सानप करत आहे.