नगर : आयुर्वेदिक हर्बल ऑइलच्या माध्यमातून 14 लाख 17 हजार 500 रुपयांची फसवणूक केल्याच्या गुन्ह्यात सायबर पोलिस ठाण्याच्या पथकाने पुण्यातून नायजेरियन टोळी जेरबंद केली. 

स्टेनले स्मिथ, नीलम गिरीश गोहेल ऊर्फ निशा शहा, ऍलेक्‍स ओडूडू ऊर्फ मार्क, ऍलेन ऊर्फ मिरॅकल (सर्व मूळ नायजेरिया, हल्ली रा. पिंपरी गुरव, पिंपरी-चिंचवड) अशी आरोपींची नावे आहेत.

सोशल मीडियावर मैत्री करून, आरोपींनी भारतातील हर्बल कंपनीकडून आयुर्वेदिक कच्चा माल कमी किमतीत खरेदी करून लाखो रुपयांचे आमिष दाखविले. विश्‍वास संपादन करण्यासाठी शासनाच्या बनावट संकेतस्थळांवरून कागदपत्रे पाठवून 14 लाख 17 हजार 500 रुपयांची फसवणूक केल्याची फिर्याद ओंकार मधुकर भालेकर यांनी सायबर पोलिस ठाण्यात दिली.

सायबर पोलिसांच्या तांत्रिक तपासात वरील चार आरोपी निष्पन्न झाले. शोध घेऊन त्यांना अटक केली. न्यायालयाने त्यांना गुरुवारपर्यंत (ता. 4) पोलिस कोठडी दिली आहे.