संगमनेर : राहत्या घराच्या अंगणात खेळत असलेल्या बालिकेवर बिबट्याने केलेल्या हल्ल्यात दोन वर्ष सात महिने वयाच्या बालिकेचा मृत्यू झाला. ही घटना सायंकाळी सहाच्या सुमारास तालुक्यातील धांदरफळ खुर्द येथील साकुर मळा परिसरात घडली. शिवांगी संतोष वाकचौरे असे तिचे नाव आहे. शेतातील वस्तीवरील घरासमोरच्या अंगणात शिवांगी खेळत होती. तर तिचे आई वडील शेजारच्या शेतात मका काढीत होते. भक्ष्याच्या शोधात असलेल्या बिबट्याने अचानक तिच्यावर हल्ला केला. (AhamadNagar News)

त्यावेळी जवळच काम करणाऱ्या तिच्या आई-वडीलानी हा प्रकार पाहून बिबट्याला हुसकण्यासाठी जोरात आरडा ओरड करीत मुलीला वाचवण्यासाठी धाव घेतली. त्यामुळे बिबट्याने तेथून पळ काढला. जखमी शिवांगीला तातडीने संगमनेरातील एका खासगी रुग्णालयात उपचारासाठी नेण्यात आले. मात्र तिचे निधन झाल्याचे उपविभागीय वनाधिकारी संदीप पाटील यांनी सांगितले. तालुक्यातील प्रवरा काठच्या परिसरात सुरक्षित अधीवासामुळे गेल्या काही वर्षात बिबट्यांची संख्या वाढली असून, मानवी जीविताला धोका होऊ लागल्याने या परिसरात पिंजरा लावण्याची मागणी सरपंच रोहिदास खताळ यांनी केली आहे.