नगर ः जिल्ह्यातील कोरोना बाधितांचा आकडा रोखण्यात प्रशासनाला यश आले होते. मात्र, मुंबईसह बाहेरील जिल्ह्यातून येणाऱ्यांमुळे आता जिल्ह्यातील कोरोना बाधितांचा आलेख उंचावत चालला आहे. आज दिवसभरात एकूण 37 जणांच्या घशातील स्त्रावची तपासणी करण्यात आली. त्यातील 36 अहवाल प्राप्त झाले. त्यात मुंबईवरून आलेल्या तीन जणांना कोरोनाची बाधा झाल्याचे स्पष्ट झाले. एक अहवालाचा निष्कर्ष न निघाल्याने पुन्हा स्त्राव घेण्यात येणार आहे. बाकी सर्व अहवाल निगेटीव्ह आलेले आहेत. 

बाहेरील जिल्ह्यातून आलेल्यांमुळे आता प्रशासनाची पुन्हा धावपळ सुरु झाली आहे. जिल्ह्यात पुणे, मुंबई आदी रेडझोनमधून अनेकजण जिल्ह्यात येऊ लागले आहेत. तेच आता कोरोनाबाधित असल्याचे स्पष्ट होत आहे. जिल्ह्यात आतापर्यंत एकूण 92 जण कोरोना बाधित आढळून आले.

हेही वाचा - चर्चा तर होणारच..विखे म्हणतात, माझं काही खरं नाही, कधीही उडी मारीन

सकाळी एकूण 17 जणांचे अहवाल आले. यामध्ये नगर शहर चार, भिंगार कॅम्प चार, कर्जत दोन, श्रीरामपूर एक, नेवासे एक, पाथर्डी एक असे एकूण 16 व औरंगाबाद जिल्ह्यातील खुलताबाद येथील एक असे एकूण 17 अहवाल निगेटीव्ह आले होते. संध्याकाळी 19 अहवाल आलेले असून त्यात तीन जण पॉझिटिव्ह निघालेले आहे.

या बाधितांनामध्ये मुंबईतील भोईवाडा, परळ येथून चास येथील पिंपळगाव रस्ता (ता. नगर) येथे आलेली 24 वर्षीय व्यक्ती, घाटकोपर येथून केळेवाडी (ता. संगमनेर) यथे आलेली 32 वर्षीय व्यक्ती तर भाईंदर येथून वडाळा महादेव (ता. श्रीरामपूर) येथे आलेली 30 वर्षीय महिला कोरोनाबाधित आढळून आली आहे. ही महिला काल (सोमवारी) कोरोनाबाधीत आढळून आलेल्या व्यक्तीची पत्नी आहे, अशी माहिती नोडल अधिकारी डॉ. बापूसाहेब गाढे व जिल्हा आरोग्यधिकारी डॉ. संदीप सांगळे यांनी दिली.