पातूर (जि. अकोला) : कोरोनाच्या पार्श्वभूमीवर जिल्ह्यातील वाढत्या आलेख लक्षात घेता सार्वजनिक ठिकाणी गर्दी टाळण्याच्या दृष्टीने शासनाने व प्रशासनाने नेमून दिलेल्या सूचनांचे काटेकोरपणे पालन व्हावे यासाठी नगरपरिषद क्षेत्रातील जनतेच्या हिताचे व सुरक्षिततेचे भान ठेवत विविध नाविन्यपूर्ण उपक्रम राबवत असल्याचे चित्र नगरपरिषद क्षेत्रात पाहायला मिळत आहे. याच क्रमात ग्रंथापाल ईश्‍वर पेंढारकरांकडून घरपोच पुस्तकांची सेवा देण्यासाठी पुढाकार घेण्यात आला आहे.

क्लिक करा- शेतकऱ्यांची अशीही अवस्था; उपाशीपोटी ताटकळत बसले तरी रिकाम्या हाताने परतले

पाचशे सभासदांना होणार फायदा
गेल्या दोन अधिक महिन्यांपासून कोरोनाने कहर केला आहे. जीवनावश्यक वस्तू वगळता सर्वच बंद असल्यामुळे नगर परिषद अंतर्गत चालणारे वाचनालय सुद्धा बंद आहेत. परंतु, वाचाल तर वाचाल यावर उक्तीला सत्यात उतरवण्याचा प्रयत्न करत नगर परिषद मुख्याधिकारी सोनाली यादव यांच्या मार्गदर्शनाखाली ग्रंथपाल ईश्वर पेंढारकर यांनी चक्क वाचनालच वाचकांच्या दारात नेण्याचा एक आगळावेगळा उपक्रम हाती घेतला आहे. नगरपरिषद वाचनालयाचे पाचशेच्या जवळपास सभासद असून, वाचकांना वाचनाची सवय या ग्रंथालयामार्फत लागलेली आहे. परंतु, कोरोना विषाणूचा संसर्ग होऊ नये सोशल डिस्टन्सिंगच्या नियमांचे पालन व्हावे यादृष्टीने वाचनालय बंद होते.

हेही वाचा- मुंबईतून निसर्ग वादळ जात नाही तोच दुसरं मोठं राजकीय वादळ

उपक्रमाचे सर्वत्र कौतुक
वाचनालयात सांस्कृतिक, सामाजिक, राजकीय, ऐतिहासिक, कथा-कादंबऱ्या स्पर्धा परीक्षांसाठी उपयुक्त मार्गदर्शिका अशी हजारो पुस्तके धूळ खात होती. परंतु, आता मुख्याधिकारी सोनाली यादव यांच्या मार्गदर्शनाखाली ग्रंथपाल ईश्वर पेंढारकर यांच्या माध्यमातून वाचकांना द्वारपोच पुस्तक सेवा पुरवण्याचे काम हाती घेतले आहे. त्यामुळे आता वाचनालयाच्या सभासदांना वाचनालयात जाण्याची गरज राहिली नाही. वाचकांना पुस्तके हवी असल्यास ग्रंथपाल यांच्याशी संपर्क साधून आपल्याला हवे असलेल्या पुस्तकाची मागणी करून आपण द्वारपोच पुस्तके मिळवून आपल्या वाचनाचा छंद जोपासावा असे आवाहन मुख्याधिकारी सोनाली यादव यांनी केले. नगरपरिषदेच्या या उपक्रमाचे व ग्रंथपाल ईश्वर पेंढारकर यांच्या कार्याचे सर्वत्र कौतुक होत आहे.