अकोला : शासनाने आशा स्वयंसेविका, गट प्रवर्तकांच्या मागण्या मान्य केल्या आहेत. परंतु लेखी आदेश, आश्वासन किंवा जी.आर. जारी न केल्याने आशा व गटप्रवर्तकांनी शुक्रवार (ता. १२) पासून संपाचे हत्यार उगारले आहे. त्यामुळे आशा व गटप्रवर्तकांसह अंगणवाडी सेविकांनी शुक्रवारी (ता. १२) जिल्हाधिकारी कार्यालयावर मोर्चा काढला.

आशा स्वंयसेविका व गटप्रवर्तकांना दिवाळी भेट दोन हजार रुपये दिवाळीपूर्वी देण्याचे आश्वासन, आशा स्वयंसेवकांच्या मोबदल्यात सात हजार रुपयांची वाढ, गटप्रवर्तकांच्या मोबदल्यात दहा हजार रुपयांची वाढ करण्याचे आश्वासन शासनाने दिले होते. सदर मागण्या मुख्यमंत्री, उपमुख्यमंत्री, महिला व बाल विकास मंत्री, आरोग्य मंत्री, विभागाचे प्रधान सचिव, आयुक्त यांनी मान्य केल्या आहेत. परंतु आजपर्यंत मंत्रीमंडळ बैठकीत याबाबत कोणताही निर्णय न झाल्यामुळे व लेखी आश्वासन आणि शासनादेश जारी न करण्यात आल्याने आशा सेविकांनी शुक्रवारी (ता. १२) जिल्हाधिकारी कार्यालयावर मोर्चा काढला. सदर मोर्चा अशोक वाटिका येथून काढण्यात आला.

मोर्चात अंगणवाडी बालवाडी कर्मचारी युनियन, आयटकच्या राज्य सचिव सुनीता पाटील, कॉ. नयन गायकवाड, मायावती बोरकर, सुरेखा ठोसर, दुर्गा देशमुख, सरोज मूर्तिजापूरकर, ज्योती ताथोड, सुनंदा पद्‍मने, आशा मदने, मंगला अढाऊ व हजारो आशा, अंगणवाडी कर्मचारी सहभागी झाल्या होत्या.

अंगणवाडी कर्मचाऱ्यांचाही सहभाग

राज्यातील व जिल्ह्यातील दोन लाखावर अंगणवाडी सेविका, मदतनीस ४ डिसेंबर, २०२३ रोजी पासून बेमुदत संपावर आहेत. पेन्शन, ग्रॅज्युटी व अंगणवाडी सेविका, मिनी अंगणवाडी सेविका यांना २६ हजार रुपये, मदतनीस यांना २० हजार रुपयांची मानधनात वाढ करण्यात यावी. अंगणवाडीसाठी पाच हजार रुपये ते आठ हजार रुपये भाडे मंजुर करावे. आहाराचा ८ रुपये दर अत्यल्प असून सदर दर सर्वसाधारण बालकांसाठी १६ रुपये व अतिकुपोषित बालकांसाठी २४ रुपये असा करावा, या मागण्यांसाठी अंगणवाडी सेविकांचा संप सुरू आहे. त्यांनी सुद्धा जिल्हाधिकारी कार्यालयावर काढण्यात आलेल्या मोर्चात सहभाग घेतला.