बुलडाणा : कोरोनाचा (Corona Virus) नवा व्हेरिएंट ओमिक्रॉनचा (Omicron Variant) रुग्ण बुलडाणा जिल्ह्यात आढळून आला आहे. नागपुरात ५ डिसेंबर रोजी ओमिक्रॉनच्या पहिल्या रुग्णाची नोंद केली गेली होती. त्यानंतर दहा दिवासांनी म्हणजे १५ डिसेंबर रोजी बुलडाण्यात एक रुग्ण आढळून आला. रुग्णाला कुठलीही गंभीर लक्षणे नसल्याची माहिती आहे. आता विदर्भात एकूण दोन रुग्ण झाले आहेत.

दुबईहून बुलडाणा शहरात आलेला ६५ वर्षीय व्यक्ती ओमिक्रॉन पॉझिटिव्ह आल्याची माहिती आहे. रुग्णाची ९ डिसेंबर रोजी कोरोना चाचणी करून नमुने ओमिक्रॉनच्या तपासणीसाठी पाठविण्यात आले होते. त्याच्या अहवाल बुधवारी पॉझिटिव्ह आला. सध्या त्याच्यावर शासकीय रुग्णालयात उपचार सुरू आहे. रुग्णाला कुठलीही गंभीर लक्षणे नसल्याची माहिती आहे.

बुलडाण्यात (Buldhana District) आढळलेल्या ओमिक्रॉनच्या (Omicron Variant) रुग्णानंतर राज्यातील कोरोना रुग्णांची संख्या २१ झाली आहे. ओमिक्रॉनने आता वेगाने पाय पसरण्यास सुरुवात केली आहे. आतापर्यंत ७७ देशांमध्ये ओमिक्रॉनचे रुग्ण आढळून आले आहेत. देशात ओमिक्रॉन मोठ्या प्रमाणात पसरत आहे. तेलंगणातील हैदराबादमध्ये ओमिक्रॉनचे आणखी दोन रुग्ण आढळून आल्याने खळबळ माजली आहे. देशातील ओमिक्रॉन रुग्णांची संख्या ५९ वप गेलेली आहे.

प्रशासनाचे बारकाईने लक्ष

रुग्णाची प्रकृती ठणठणीत आहे. जिल्ह्यातील नागिराकांनी घाबरून जाऊ नये, असे आवाहन जिल्हा प्रशासनाच्या वतीने करण्यात आले आहे. ओमिक्राॅन संसर्ग वाढू लागल्यानंतर परदेशातून आलेल्या नागरिकांवर जिल्हा प्रशासनाचे बारकाईने लक्ष होते. या व्यक्तीच्या संपर्कातील इतर व्यक्ती निगेटिव्ह आले आहेत.