अकोला : कोरोनाच्या पहिल्या लाटेपेक्षा दुसरी लाट अधिक धोकादायक ठरली होती. त्याचवेळी तिसऱ्या लाटेची भितीही व्यक्त करण्यात आली होती. सुदैवाने अकोला शहर व जिल्ह्यात अद्याप तिसऱ्या लाटेची शक्यता दिसत नाही. मात्र, विदेशात व त्यानंतर महाराष्ट्रातही कोरोनाचा नवीन व्हेरियन्ट ओमीक्रॉन आढळल्याने संसर्गाची शक्यता वाढली आहे. हा संसर्ग रोखण्यासाठी कोरोना प्रतिबंधक लस प्रवाभी ठरणार असून, सार्वजनिक ठिकाणी नियमितपणे मास्क वापरल्यास स्वतःसोबत कुटुंबाचेही संरक्षण करता येणार असल्याने लस घेणे आवश्यक असून, मास्कचा नियमित वापर करण्याचे आवाहन महानगरपालिका आयुक्त कविता द्विवेदी यांनी केले आहे.

भारताबाहेर बऱ्याच देशांमध्‍ये कोरोनाचा नवीन व्‍हेरीयन्‍ट ओमीक्रॉनचा मोठ्या प्रमाणात प्रसार होत आहे. हा व्हेरियन्ट धोकादायक नसला तरी संसर्गाचा वेग काळजी वाढविणारा आहे. कर्नाटक व काही राज्‍यासह महाराष्‍ट्रात सुध्‍दा कोरोनाच्‍या नवीन व्‍हेरीयन्‍ट ओमीक्रॉनचा संसर्ग झालेले रुग्‍ण आढळून आलेले आहे. हा नवीन व्हेरियन्ट अकोला शहरापर्यंत पोहोचण्यापूर्वीच नागरिकांनी काळजी घेण्याची गरज आहे. प्रत्‍येक नागरिकानी कोरोना प्रतिबंधात्‍मक उपाययोजनांचे काटेकोरपणे पालन करणे खूप गरजेचे आहे.

जागतिक आरोग्‍य संघटनेच्‍या निकषानुसार सद्यास्थितीत प्रशासनाव्‍दारे देण्‍यात येणाऱ्या कोव्‍हीशील्‍ड आणि को-व्‍हॅक्‍सीन या दोन्‍ही लस कोरोनाच्‍या नवीन व्‍हेरीयन्‍टवर सुध्‍दा प्रवाभी आहे. त्यामुळे शहरातील प्रत्‍येक नागरिकानी लसीकरण करून घेणे व आपल्‍या परिवाराचे संरक्षण करून महानगरपालिका प्रशासनास सहकार्य करावे, असे आवाहन मनपा आयुक्तांनी केले आहे.