मोताळा : अचानक झालेल्या बिबट्याच्या हल्ल्यात सामाजिक वनीकरण विभागातील एक कर्मचारी जखमी झाल्याची घटना नळगंगा धरणानजीकच्या रोपवाटिकेत २९ जूनच्या सायंकाळी घडली. नारायण श्रीराम सैरीसे (३०) असे जखमी कर्मचाऱ्याचे नाव आहे.

तालुक्यातील नळगंगा धरणानजीक सामाजिक वनीकरण विभागाची रोपवाटिका आहे. या रोपवाटिकेत सामाजिक वनीकरण विभागातील कर्मचारी नारायण सैरीसे व काही रोहयो मजूर काम करतात.

२९ जूनच्या सायंकाळी सव्वापाच वाजताच्या सुमारास सर्व मजूर कामावरून परत गेल्यावर नारायण सैरीसे हे रोपवाटिकेतून बाहेर निघत होते. दरम्यान, त्यांच्यावर अचानक बिबट्याने हल्ला केला. यावेळी सैरीसे यांनी आरडाओरडा केला असता, नर्सरीसमोरून जाणाऱ्या काही नागरिकांनी मदतीसाठी धाव घेतली.

त्यामुळे बिबट्याने तेथून पळ काढला. मात्र या हल्ल्यात नारायण सैरीसे यांच्या पाठीवर दुखापत झाली आहे. माहिती मिळताच वनक्षेत्रपाल प्रशांत राजपूत व रोजगार सेवक संदीप मापारी यांनी जखमी नारायण सैरीसे यांना उपचारासाठी मोताळा ग्रामीण रुग्णालयात दाखल केले.

दरम्यान, सामाजिक वनीकरण आणि मोताळा वनविभागाला या घटनेची माहिती देण्यात आली आहे. या घटनेमुळे परिसरात बिबट्याची दहशत पसरली आहे. वनविभागाने या बिबट्याचा बंदोबस्त करावा, अशी मागणी होत आहे.

नर्सरीत दोन बिबट्यांचा मुक्तसंचार

तीन ते चार दिवसांपूर्वी नारायण सैरीसे यांना या रोपवाटिकेत दोन बिबट मुक्तसंचार करताना दिसून आले. यावेळी सैरीसे यांच्या सोबत असलेल्या नर्सरीतील कुत्र्यांनी बिबट्यांच्या दिशेने भुंकायला सुरुवात केली. तसेच सैरीसे यांनी आरडाओरडा केला.

त्यामुळे दोन्ही बिबट्यांनी पळ काढला. ही बाब सैरीसे यांनी मोताळा सामाजिक वनीकरणचे आरएफओ शिपे यांच्या कानावर घातली होती. परंतु यावर कोणतीच उपाययोजना करण्यात आली नाही. त्यानंतर सैरीसे यांच्यावर बिबट्याने हल्ला केल्याची घटना घडली आहे. संबंधितांनी वेळीच उपाययोजना केली असती तर ही घटना घडली नसती, अशी चर्चा आहे.

या नर्सरीत रोहयो मजूर काम करतात. मी ग्राम रोजगार सेवक असून, दिवसातून दोन वेळा मजुरांची हजेरी घेण्यासाठी या नर्सरीत जातो. येथे बिबट्यांचा मुक्तसंचार सुरू असल्याने परिसरात दहशत पसरली आहे. शासनाने आम्हाला विमा कवच प्रदान करावा. तसेच वन विभागाने या बिबट्यांचा बंदोबस्त करावा.

- संदीप मापारी, ग्राम रोजगार सेवक, रा.चिंचपूर