अकोला : केंद्र शासनाच्या आधारभूत किंमतीवर आधारित रब्बी हंगाम २०२२-२३ अतंर्गत नाफेडमार्फत जिल्ह्याला आणखी एक लाख क्विंटलचे वाढीव उद्दिष्ट मिळणार असल्याची सूत्रांची माहिती आहे. शुक्रवार, १९ मे रोजी यासंदर्भात मार्केटिंग फेडरेशनचे एमडी सुधाकर तेलंग यांनी जिल्ह्यातील केंद्र संचालकांशी शासकीय विश्रामगृह येथे संवाद साधला.

जिल्ह्यातील दहा केंद्रांवर केंद्र शासनाच्या आधारभूत किंमतीवर आधारित रब्बी हंगाम २०२२-२३ अतंर्गत नाफेडमार्फत हरभरा खरेदीची प्रक्रिया सुरू आहे. गत १९ एप्रिल रोजी उद्दिष्ट संपल्यावरून खरेदी प्रक्रिया बंद करण्यात आली होती. त्यानंतर राजकिय पक्ष व सामाजिक संघटनांनी चना खरेदी करण्यासाठी आवाज उठवला.

त्यानंतर जिल्ह्याला नव्याने ९१ हजार ९१४ क्विंटल वाढीव उद्दिष्ट शासनाकडून २७ एप्रिल रोजी मंजूर करण्यात आले. मध्यंतरी जिल्ह्यात सर्व दूर अवकाळी पावसाची हजेरी तसेच बारदाण्याची टंचाई यामुळे केंद्रांवरील खरेदी प्रक्रिया बंद करण्यात आली होती मात्र ८ मे रोजी जिल्हा मार्केटिंग अधिकारी यांनी नव्याने आदेश काढून संबंधित केंद्रांना उद्दिष्ट ठरवून खरेदी बाबत आदेशित केले होते.

त्यानंतर १० पासून खरेदीची प्रक्रिया पुन्हा नव्याने सुरू झाली आहे. मात्र नोंदणीकृत शेतकऱ्यांची खरेदी होणार का हा प्रश्न ऐरणीवर असतांना जिल्ह्याला आणखी एक लाख क्विंटलचे उद्दिष्ट मिळणार असल्याची माहिती आहे. त्यामुळे शेतकऱ्यांना काहीअंशी दिलासा मिळणार आहे. मार्केटींग फेडरेशनचे व्यवस्थापक महेंद्रजी ढेकाणे यांनी खरेदीदार संस्थांच्या प्रतिनिधींनी उपस्थित केलेल्या शंकांचे निरसन केले.

एमडीनी साधला केंद्र संचालकांशी संवाद

दि महाराष्ट्र स्टेट को ऑपरेटिव्ह मार्केटिंग फेडरेशनचे व्यवस्थापकीय संचालक सुधाकरजी तेलंग यांनी केंद्र संचालकांशी संवाद साधला. यावेळी मार्केटिंग फेडरेशनचे व्यवस्थापक महेंद्र ढेकाणे, विभागीय व्यवस्थापक टिकेले, जिल्हा मार्केटिंग अधिकारी पी एस शिंगणे, एस एस सरप, तेल्हारा खरेदी विक्री संघाचे अध्यक्ष सुरेश ढोले, पुंडलीकराव अरबट, नथूजी कापसे, बेलखेड फार्मर प्रोड्युसर कंपनीचे अध्यक्ष ॲड.सुधाकर खुमकर, विवरा येथील केंद्र चालक दीपक बोचरे, संतोष दांदळे, उपस्थित होते.