Guru Purnima 2025: हिंदू धर्मामध्ये गुरुपौर्णिमेला विशेष महत्त्व आहे. या दिवशी गुरूंची मनोभावे पूजा केली जाते आणि त्यांचा सन्मान केला जातो. ही गुरुपौर्णिमा दरवर्षी आषाढ महिन्याच्या शुक्ल पक्षाच्या पौर्णिमेला साजरी केली जाते. यंदा १० जुलैरोजी गुरुपौर्णिमा साजरी केली जाते. गुरूंच्या कृपेमुळे जीवनात सुख, शांती, आणि समृद्धी येते असं मानलं जातं. गुरुपौर्णिमेच्या दिवशी योग्य विधीने पूजा करून गुरूंचा आशीर्वाद प्राप्त करून घेणे महत्त्वाचे आहे. यामुळे जीवनात यश आणि प्रगती होते. गुरुपौर्णिमेचा शुभ मुहूर्त अन् महत्व काय हे जाणून घेऊया.

यंदा गुरुपौर्णिमा कधी आहे?

यंदा गुरुपौर्णिमा १० जुलै २०२५, गुरुवारी साजरी केली जाणार आहे. सकाळी १ वाजून ३६ मिनिटांनी सुरू होईल आणि ११ जुलै रोजी पहाटे २ वाजून ६ मिनिटांनी समाप्त होईल. यामुले १० जुलैरोजी गुरुपौर्णिमा साजरी केली जाणार आहे.

गुरुपौर्णिमेचा पूजा विधी

पहाटे लवकर उठून स्नान करावे.

स्वच्छ आणि नवीन कपडे परिधान करावेत.

देवाचे नामस्मरण करून दिवसाची सुरवात करावी.

सूर्यदेवतेला अर्घ्यदान करावे.

पूजेच्या ठिकाणी भगवान विष्णू आणि वेदव्यास यांच्या मूर्ती किंवा फोटोची स्थापना करावी.

मूर्ती किंवा फोटोवर फुले, धूप, दीप, अक्षता अर्पण करावीत.

तुपाचा दिवा लावून आरती करावी आणि गुरूकवचाचे पठण करावे.

देवाला फळे, मिठाई, खीर किंवा गोड पदार्थाचा नैवेद्य दाखवावा.

बुद्धिमत्ता किंवा ज्ञानासाठी उपयुक्त पुस्तकाची पूजा करू शकता.

गरिबांना अन्न, दक्षिणा, कपडे किंवा अभ्यासाशी संबंधित वस्तूंचे दान करणे शुभ मानले जाते.

महत्व

गुरुपौर्णिमा ही व्यास पौर्मिमा म्हणून ओळखली जाते. धार्मिक मान्यतेनुसार या दिवशी महर्षी वेद व्यासांचा जन्म झाला होता. या दिवशी गुरुपौर्णिमा साजरी केली जाते. वेद व्यासांनी अनेक वेद आणि पुराणे रचली होती. त्यामुळे याला व्यास पौर्णिमा म्हणतात. या दिवशी शिष्य आपल्या गुरुंची पूजा करुन आशीर्वाद घेतात.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.