पाटणा - राष्ट्रीय जनता दलाचे सर्वेसर्वा लालू प्रसाद यादव हे त्यांचा ज्येष्ठ पुत्र तेजप्रताप यादव यांच्या बेशिस्त वागणुकीवर नाराज असल्याची चर्चा सुरू झाली आहे. दोन्ही मुलांच्‍या वादात लालू प्रसाद यादव यांनी तेजस्वी यादव यांना साथ दिली आहे.

यादव कुटुंबातील इतर सदस्यही तेजप्रताप यांच्याबद्दल सध्‍या फारसे बोलत नाहीत. कुटुंबप्रमुख असलेल्या लालू प्रसाद यादव यांच्‍या भूमिकेमुळे तेजप्रताप व तेजस्वी या भावंडांमधील मतभेद व मनभेद आणखी तीव्र होण्याची शक्यता वर्तविली जात आहे. दोघांमधील संघर्ष रस्त्‍यावर आल्यानंतर दोघेही रविवारी (ता.२२) दिल्लीला स्वतंत्रपणे गेले. लालू प्रसाद यादव हे दिल्लीत उपचार घेत आहेत.

वडिलांना भेटून स्वतःची बाजू मांडण्याच्या आशेने तेजप्रताप हस्तिनापूरला पोचले, पण लालू त्यांना भेटलेच नाही. ते तेजप्रतापवर एवढे नाराज आहेत की, त्यांची भेटही टाळली. उलट तेजस्वी यादवला भेटून लालू प्रसाद यादव यांनी मोठ्या मुलाची माहिती घेतली. वडिलांच्या भेटीचे छायाचित्रही तेजस्वी यांनी शेअर केले आहे. वडील भेटले नाही तरी आई राबडी देवी आणि बहिणींबरोबरील छायाचित्र तेजप्रताप यादव यांनी शेअर केले आहे.

‘आरजेडी’त काही दिवसांपासून सुरू असलेला वाद लालू प्रसाद यांच्या या पवित्र्याने थांबला असली तरी तेजप्रताप यांचा भूतकाळ पाहता हा वाद शमण्याची चिन्ह नसल्याचे दिसत आहे. तेजप्रताप हे तेजस्वी यादव यांच्याविरोधात जी भाषा वापरत आहेत, ती पाहता दोघांची मने पुन्हा जुळणे सोपे नाही.