AIMIM Party News : आगामी लोकसभा निवडणूक २०२४ मध्ये भाजप आणि नरेंद्र मोदी यांना रोखण्यासाठी १८ जुलै रोजी कर्नाटकची राजधानी बंगळुरू येथे विरोधकांची बैठक पार पडली. बैठकीला असदुद्दीन ओवैसी यांचा पक्ष ऑल इंडिया मजलिस-ए-इत्तेहादुल मुस्लिमीन(AIMIM) सहभागी झाला नाही.

त्यानंतर एआयएमआयएमने बंगळुरू येथे झालेल्या या बैठकीवर जोरदार निशाणा साधला आहे. पक्षाचे प्रवक्ते वारिस पठाण यांनी, त्यांनी (विरोधी पक्षांनी) आम्हाला बोलवला नाही, त्यांच्यासाठी आम्ही राजकीय अस्पृश्य आहोत अशी प्रतिक्रिया दिली.

पठाण म्हणाले की, त्या बैठकीला नितीश कुमार, उद्धव ठाकरे आणि महबूबा मुफ्ती देखील सहभागी झाले, हे एकेकाळी भाजपसोबत सत्तेत सहभागी होते. हे सगळे अचानक सेक्युलर झाले आहेत. केजरीवाल देखील आहेत ज्यांनी गुजरात निवडणुकीत सतत शिव्या घालून काँग्रेसला पराभव पत्करायला लावला आणि आता त्यांच्यात सोबत जाऊन बसले आहेत. ते देखील सेक्युलर झाले आहेत.

एआयएमआयएम प्रवक्त्याने त्यांच्या पक्षांना विरोधकांनी एकटं पाडल्याचा आरोप केला. विरोधकांचे म्हणणे आहे की संविधान वाचवायचे आहे, लोकशाहीचे संक्षण करायचे आणि भाजपला पराभूत करायचे आहे. आमचे ध्येय देखील हेच आहे की कुठल्याही परिस्थीतीत भाजपला पराभूत करून २०२४ मध्ये पुन्हा नरेंद्र मोदी पंतप्रधान बनू नयेत. मग तुम्ही (विरोधक) आमच्याकडे दुर्लक्ष कसे करू शकतात, असेही पठाण म्हणाले.

भाजपची बी कोण टीम?

एआयएमआयएम नेत्याने आरोप केला की, विरोधकांना मुस्लिम समाजाची मते हवी आहेत पण मुस्लिमांचे प्रतिनिधित्व नको आहे. आम्हाला सगळे भाजपती बी टीम म्हणतात. काही दिवसांपूर्वी महाराष्ट्रात सर्वांनी खरंच कोण भाजपची बी टीम आहे ते पाहिलं असंही ते म्हणाले.