PM Narendra Modi on dynasticism

नवी दिल्ली - काँग्रेस पक्षातील घराणेशाहीवर पंतप्रधान नरेंद्र मोदी यांनी वारंवार टीका केली आहे. स्वातंत्र्य दिनी पंतप्रधान मोदी यांनी लाल किल्ल्यावरुन केलेल्या भाषणात देखील घराणेशाहीचा उल्लेख केला होता. विरोधकांनी पलटवार म्हणून भाजप पक्षातही घराणेशाही अस्तित्वात आहे असे निदर्शनास आणून दिले होते. याच संदर्भात पंतप्रधान मोदी भाजप पक्षातील घराणेशाहीला चाप लावणार असल्याचं कळतंय.

बुधवारी भाजप नेत्यांची बैठक झाली होती. या बैठकीमध्ये पक्षातील घराणेशाहीवर चाप कसा लावता येईल, याबाबत चर्चा झाल्याचं विश्वसनीय सूत्रांनी सांगितलं आहे. भाजप नेत्यांच्या सर्वच मुलांना उमेदवारी दिली जाणार नाही, त्याऐवजी महिला आणि युवकांना उमेदवारी देण्याचा मोदींचा मानस असल्याचं सांगण्यात आलं आहे. भाजप नेत्याच्या अनेक मुलांना येत्या काळात उमेदवारी दिली जाणार नाही. त्याऐवजी महिला आणि तरुणांना प्राधान्य दिले जाणार आहे.

लोकसभेच्या निवडणुका नऊ महिन्यांवर येऊन ठेवल्या आहेत. त्यामुळे भाजपमधील अनेक नेते उमेदवारी मिळवण्यासाठी प्रयत्नशील आहेत. पण, सध्या मंत्रिमंडळात असलेल्या काही मंत्र्यांची लोकसभेसाठी तिकीट कापली जाणार असल्याची माहिती आहे. त्याऐवजी नव्या चेहऱ्यांना संधी दिली जाणार आहे.

पंतप्रधान मोदी यांनी आपल्या अनेक भाषणातून काँग्रेसमध्ये असलेल्या घराणेशाहीवर कठोर टीका केलीये. पण, भाजपमध्येही घराणेशाही असल्याचं लपून राहिलेलं नाही. त्यामुळे मोदी यांना अगोदर भाजप पक्षामध्ये असलेली घराणेशाही संपवावी लागणार आहे. त्यादृष्टीने लोकसभेमध्ये अनेक नेत्यांचे तिकीट कापले जाण्याची शक्यता आहे. असे असले तरी घराणेशाही ही भारतीय राजकारणात खोलवर रुतलेली आहे. त्यामुळे मोदी यांना त्यांच्या कामात कितपत यश मिळेल हे पाहावं लागेल. (Latest Marathi News)