नवी दिल्ली : केंद्रीय आणि राज्यातील मंत्रिमंडळाच्या हालचालींना वेग आल्याची सध्या चर्चा आहे. कारण मुख्यमंत्री एकनाथ शिंदे हे दिल्लीसाठी रवाना झाले आहेत. याठिकाणी ते गृहमंत्री अमित शहा यांची भेट घेणार आहेत. त्यामुळं या भेटीनंतर मंत्रिमंडळाच्या विस्ताराबाबत महत्वाची घोषणा होण्याची शक्यता आहे. (Cabinet Expansion CM Eknath Shinde leaves for Delhi will meet Amit Shah)

केंद्रीय मंत्रिमंडळात शिंदे गटाला मंत्रिपद मिळण्याबाबत या बैठकीत चर्चा होऊ शकते. शिंदे गटाच्या वाट्याला दोन मंत्रिपदं येणार असल्याचीही यानिमित्त चर्चा सुरु आहे. मुख्यमंत्र्यांबरोबरच उपमुख्यमंत्री देवेंद्र फडणवीस देखील विमानतळावर दाखल झाले आहेत.

मंत्रिमंडळाच्या विस्ताराबाबत निर्णय झाल्यानंतर ते दोघेच याबाबत अधिकृत माहिती देतील. भाजपच्या वरिष्ठ नेत्यांशी चर्चा करुन मंत्रिमंडळाचं आकारमान किती असावं? कोणाला मंत्रिपदं द्यायची तसेच त्यांना कुठली खाती द्यायची हे ते निश्चित करतील. पावसाळी अधिवेशनापूर्वी राज्य मंत्रिमंडळाचा विस्तार होऊ शकतो, अशी प्रतिक्रिया यावेळी मंत्री सुधीर मुनगंटीवार यांनी दिली आहे.