नवी दिल्ली - भारतात तयार झालेली कोरोना लस कोव्हॅक्सिनच्या आपत्कालीन वापराला जागतिक आरोग्य संघटनेकडून मंजुरी मिळण्यास आणखी उशिर होऊ शकतो. भारत बायोटेकला आणखी काही टेक्निकल प्रश्न विचारण्यात आले असल्याचे समजते. यामुळे भारतीयांना विशेषत: विद्यार्थ्यांच्या आंतरराष्ट्रीय प्रवासावर परिणाम होऊ शकतो. या मंजुरीशिवाय कोव्हॅक्सिनला जगभरातील बहुतांश देश अधिकृत लस मानणार नाहीत. भारत बायोटेकने मंजुरीसाठी आवश्यक तो सर्व डेटा दिल्यानंतरही त्यांना पुन्हा प्रश्न विचारण्यात आल्याचं सांगितलं जात आहे.

केंद्रीय आरोग्य मंत्रालयाने नुकतंच असं सांगितलं होतं की, लशीचा कधीही मंजुरी मिळू शकते. मात्र आता त्याऊलट अशी परिस्थिती समोर आली आहे. एएनआयने दिलेल्या एका रिपोर्टनुसार, केंद्रीय राज्य मंत्री डॉक्टर भारती पवार यांनी असं म्हटलं होतं की, मंजुरीसाठी कागदपत्रे देणे ही एक प्रक्रिया आहे. कोव्हॅक्सिनला लवकरच आपत्कालीन वापरासाठी मंजुरी मिळेल. याआधी नॅशनल एक्स्पर्ट ग्रुपचे डॉक्टर वीके पॉल यांनीही म्हटलं होतं की, कोव्हॅक्सिनसाठी जागतिक आऱोग्य संघटनेची मंजुरी या महिन्याच्या शेवटी मिळण्याची शक्यता आहे.

भारत बायोटेकने दिलेल्या माहितीनुसार, तिसऱ्या टप्प्यातील क्लिनिकल ट्रायल यशस्वी पार पडली होती. त्यात कोव्हॅक्सिन लस ही ७७.८ टक्के प्रभावी असल्याचं समोर आलं होतं. देशभरात लसीकरण मोहिमेत कोविशील्डसह कोव्हॅक्सिन लशीचे डोसही देण्यात आले आहेत. देशात जानेवारीपासून लसीकरण मोहिम सुरु आहे. कोव्हॅक्सिन, कोविशील्डशिवाय रशियाची स्पुटनिकसुद्धा आता भारतात उपलब्ध आहे.