राज्य सरकारी सेवेत कार्यरत असलेल्या एका कर्मचाऱ्याकडून वीस लाख रुपयांची खंडणी वसूल केल्याप्रकरणी तमिळनाडू पोलिसांनी आज मदुराईमध्ये चक्क सक्तवसुली संचालनालयाच्या (ईडी) अधिकाऱ्यालाच अटक केली.

पोलिस अधिकाऱ्यांनी या चौकशीचा एक भाग म्हणून केंद्रीय तपास संस्थेची कार्यालये आणि अधिकाऱ्यांच्या निवासस्थानांची देखील झडती घेतल्याचे समजते. या कारवाईमध्ये अनेक महत्त्वाची कागदपत्रे पोलिसांच्या हाती लागली आहेत.

दरम्यान ‘ईडी’सारख्या केंद्रीय तपास यंत्रणेच्या अधिकाऱ्यास तमिळनाडूमध्ये अटक होण्याची ही पहिलीच वेळ आहे. अंकित तिवारी असे अटक करण्यात आलेल्या अधिकाऱ्याचे नाव असून त्याला तूर्त १५ डिसेंबरपर्यंत न्यायालयीन कोठडी सुनावली आहे.

दरम्यान पोलिसांच्या या कारवाईवर तपास संस्थेने मात्र कसल्याही प्रकारचे भाष्य केलेले नाही. मध्यंतरी मनी लाँड्रिंगच्या प्रकरणात ‘ईडी’ने पाच जिल्ह्यांच्या जिल्हाधिकाऱ्यांना समन्स बजावले होते त्यामुळे राज्य सरकार विरुद्ध केंद्रीय तपास यंत्रणा असा संघर्ष निर्माण झाला होता.

याच आठवड्यात मद्रास उच्च न्यायालयाने ‘ईडी’च्या समन्सला तीन आठवड्यांसाठी स्थगिती दिल्याने मुख्यमंत्री स्टॅलिन यांना दिलासा मिळाला होता. अरियालूर, वेल्लोर, तंजावर, करूर आणि तिरुचिरापल्ली जिल्ह्यांतील जिल्हाधिकाऱ्यांना समन्स बजावण्यात आले होते. यासाठी अधिकाऱ्यांना प्रतिसाद देण्यासाठी ‘ईडी’कडून राज्य सरकारला तीन आठवड्यांचा वेळही दिला होता.