जयपूर : हिंदु आणि हिंदुत्ववादी याचा अर्थ काँग्रेस खासदार राहुल गांधी यांनी समजावून सांगाव लागला आहे. यासाठी त्यांनी महात्मा गांधी आणि नथुराम गोडसे या दोघांचा दाखला दिला आहे. जयपूर येथे रविवारी काँग्रेसची रॅली पार पडली, यामध्ये राहुल गांधी बोलत होते.

राहुल गांधी, "मला तुम्हाला हिंदू आणि हिंदुत्वातील फरक सांगायचा आहे. हिंदुंचा मार्ग हा सत्याचा मार्ग असतो आणि ते सत्यासाठी प्राण त्यागायलाही तयार असतात. महात्मा गांधी यांनी आपलं संपूर्ण आयुष्य सत्याच्या शोधात घालवलं, तर हिंदुत्ववादी गोडसेनं त्यांच्यावर तीन गोळ्या चालवल्या. भगवत् गीता हिंदुंना सत्य शोधण्यास सांगते तर दुसरीकडं हिंदुत्ववाद्यांना सत्याशी काही घेणदेणं नसतं ते केवळ सत्तेचे तहानलेले असतात. त्यांना भीती वाटत असल्यानं त्यांच्यामध्ये द्वेष ठासून भरलेला असतो. दरम्यान, सत्ताधारी मोदी सरकारवर टीका करताना राहुल गांधी म्हणाले, सन २०१४ पासून हिंदुत्ववादी सत्तेत आहेत तर हिंदू सत्तेबाहेर आहेत. ते (हिंदुत्ववादी) खोटे हिंदू आहेत."

नेते नव्हे तर उद्यागपती चालवताहेत देश

महागाईविरोधात काढलेल्या या रॅलीत बोलताना राहुल गांधी म्हणाले, ही रॅली महागाई आणि बेरोजगारीविरोधात आहे. आपण देशाची सध्याची स्थिती पाहत आहात. सध्या नेते देश चालवत नाहीएत तर तीन-चार उद्योगपती चालवताहेत.

सीडीएस बिपीन रावत यांना वाहिली श्रद्धांजली

दरम्यान, या रॅलीमध्ये नुकतेच हेलिकॉप्टर अपघातात मृत्यू पावलेले सीडीएस बिपीन रावत यांच्या स्मरणार्थ मौन पाळण्यात आलं. या अपघातात रावत यांच्यासह त्यांच्या पत्नी आणि इतर ८ लष्कराचे वरिष्ठ अधिकाऱ्यांचाही मृत्यू झाला.