हिमाचल प्रदेशमधील किन्नौरमध्ये तळीये गावाची पुनरावृत्ती झाली आहे. निगुलसेरी राष्ट्रीय महामार्ग क्रमांक ५ वर दरड कोसळी असून ढिगाऱ्याखाली प्रवाशांनी भरलेली बस आणि काही छोटी वाहनं अडकली होती. या दुर्घटनेत आत्तापर्यंत १० जणांचा मृत्यू झाला असून इतर १४ जणांना सुखरुप वाचवण्यात यश आलं आहे. बुधवारी दुपारी एक वाजण्याच्या सुमारास ही दुर्घटना घडली.

ढिगाऱ्याखाली अडकलेल्या बसमध्ये 35 ते 40 प्रवाशी होते. हिमाचल प्रदेश रोड ट्रान्सपोर्टची बस या ढिगाऱ्याखाली अडकली. हरिद्वारवरुन बस निघाली होती. त्यावेळी निगुलसेरी जवळ ही दुर्घटना घडली. या दुर्घटनेत बस चालक बचावला आहे. चालकाने प्रसंगावधान राखत तात्काळ दुर्घटनेची माहिती दिली. त्यानंतर बचावकार्यासाठी ITBP चं पथक रवाना झालं आहे.

हिमाचल प्रदेशचे मुख्यमंत्री जयराम ठाकूर यांनीही या घटेनला दुजोरा दिला आहे. तसेच NDRF पथकालाही पाचारणं केल्याचं त्यांनी सांगितलं. दरडीखाली एक बस आणि कार आल्याची माहिती मिळाल्याचे मुख्यमंत्री जयराम ठाकूर यांनी सांगितलं.