नवी दिल्ली - देशात आता कोरोनाच्या दुसऱ्या लाटेनंतर तिसऱ्या लाटेची भीती व्यक्त केली जात आहे. गुरुवारी देशात पुन्हा कोरोना रुग्णांच्या संख्येत वाढ झाली आहे. गेल्या 24 तासात 41 हजार 195 नवे रुग्ण सापडले असून एकूण रुग्णसंख्या 3 कोटी 20 लाख 77 हजार 706 इतकी झाली आहे. तसंच दिवसभरात 490 जणांचा कोरोनामुळे मृत्यू झाला आहे. आतापर्यंत कोरोनामुळे देशातील 4 लाख 29 हजार 669 जणांचा मृत्यू झाला आहे. हळू हळू वाढणाऱ्या रुग्णसंख्येनं देशात तिसऱ्या लाटेची भीती निर्माण केली आहे. तज्ज्ञांकडून याआधी सातत्यानं तिसऱ्या लाटेचा इशारा दिला गेला आहे.

बुधवारच्या तुलनेत गुरुवारी नव्या रुग्णसंख्येत वाढ झाली आहे. बुधवारी दिवसभरात 38 हजार 353 रुग्ण आढळले होते. देशातील सक्रीय रुग्णांची संख्या कमी झाली आहे. सध्या देशात 3 लाख हजार 987 जण उपचार घेत असून एकूण रुग्णसंख्येच्या तुलनेत हे प्रमाण 1.21 टक्के इतकं आहे. देशातील बऱ्या होणाऱ्या रुग्णांचे प्रमाण दिलासादायक असे आहे. रिकव्हरी रेट हा 97.45 टक्के इतका आहे. आरोग्य मंत्रालयाने दिलेल्या माहितीनुसार आतापर्यंत 3 कोटी 12 लाख 60 हजार 50 जण कोरोनामुक्त होऊन घरी परतले आहेत.

कोरोनाला रोखण्यासाठी देशात लसीकरण मोहिम सुरु आहे. आतापर्यंत 52 कोटी 32 लाख 53 हजार 450 जणांना कोरोना लस देण्यात आली आहे. लसीकरण सुरु असले तरी वाढती रुग्णसंख्या चिंतेत भर टाकणारी आहे. त्यातच डेल्टाच्या रुग्णसंख्येतही वाढ होत आहे. केरळमध्ये दररोज हजारो रुग्ण आढळत असून बेंगळुरुत मुलांना कोरोनाची लागण होण्याचं प्रमाण जास्त आहे. त्यामुळे कोरोनाच्या प्रोटोकॉलचे पालन करण्याचा सल्लाही दिला जात असून गरज असेल तरच बाहेर पडा असं सांगितलं जात आहे. अद्याप काही राज्यात कडक निर्बंध आहेत.