Cheetah Helicopter Crash: अरुणाचल प्रदेशातील बोमडिलाच्या पश्चिमेकडील मंडलाजवळ आज ११च्या दरम्यान लष्कराचे चित्ता हेलिकॉप्टर कोसळले. या अपघातात दोन्ही वैमानिकांचा मृत्यू झाल्याची बातमी समोर आली आहे. हा अपघात कसा घडला याची माहिती अद्याप समोर आलेला नाही.

लेफ्टनंट कर्नल महेंद्र रावत यांनी सांगितले की, बोमडिलाजवळ ऑपरेशनल उड्डाण करणाऱ्या हेलिकॉप्टरचा सकाळी 9.15 वाजता एअर ट्रॅफिक कंट्रोलशी (एटीसी) संपर्क तुटला होता. त्यानंतर 'बोमडिलाच्या पश्चिमेला मंडलाजवळ ते कोसळले. हेलिकॉप्टर कोसळल्यानंतर बचाव कार्यासाठी पथके पाठवण्यात आली. यावेळी अपघातात लेफ्टनंट कर्नल बीबी रेड्डी आणि मेजर जयंत या दोन पायलटांचे मृतदेह अपघातस्थळावरून सापडले आहेत.

गेल्या वर्षी देखील चित्ता हेलिकॉप्टरचा अपघात झाला होता

यापूर्वी 2022 मध्ये देखील तवांगजवळ भारतीय लष्कराचे चित्ता हेलिकॉप्टर क्रॅश झाले होते. या अपघातात दोन वैमानिकांपैकी एकाचा मृत्यू झाला होता. 5 ऑक्टोबर 2022 रोजी सकाळी 10 वाजताच्या सुमारास तवांगजवळील फॉरवर्ड भागात उड्डाण करणारे लष्कराचे चित्ता हेलिकॉप्टरचा नियमित उड्डाण करताना अपघात झाला होता. दोन्ही वैमानिकांना जवळच्या रुग्णालयात नेण्यात आले मात्र एकाला वाचवता यश आलं नाही. लेफ्टनंट कर्नल सौरभ यादव असे मृत वैमानिकाचे नाव आहे.

सदर बातमीमधील फोटो प्रातिनिधिक स्वरूपाचा वापरण्यात आला होता. The quint या वेबसाईटने केलेल्या फॅक्टचेक मध्ये तो फोटो चुकीचा असल्याचे समोर आले. त्यामुळे बातमीतील फोटो अपडेट करण्यात आला आहे.