Indian Plane Crashed in Afghanistan : भारताहून रशियाकडे जाणारं एक विमान अफगाणिस्तानमध्ये क्रॅश झाल्याची माहिती समोर आली आहे. तेथील स्थानिक माध्यम टोलो न्यूजने याबाबत माहिती दिली आहे. बदख्शां प्रांताच्या माहिती व सांस्कृतिक मंत्रालयाने याबाबत माहिती दिल्याचं टोलो न्यूजने म्हटलं आहे.

मिळालेल्या माहितीनुसार, हे विमान भारतातून मॉस्कोकडे निघालं होतं. अफगाणिस्तानच्या बदख्शां प्रांतामध्ये हे विमान कोसळलं. येथील पोलिसांनी सांगितलं, की हे विमान काल रात्री रडारवरुन अदृश्य झालं होतं. यानंतर जिबाक जिल्ह्यातील डोंगराळ भागात हे विमान क्रॅश झालं. तालिबानने याची पुष्टी केली आहे. (Indian Plane Crash)

बदख्शां प्रांतातील माहिती मंत्रालय प्रमुखांनी सांगितलं, की याबाबत अधिक तपास करण्यासाठी एक शोधपथक पाठवण्यात आलं आहे.

'ते' विमान भारताचं नाही

दरम्यान, क्रॅश झालेलं विमान भारताचं नसल्याची माहिती DGCA ने दिली आहे. भारताच्या सर्व फ्लाईट्स वेळेवर आणि सुरळीत सुरू आहेत. हे विमान भारतामधूनच मॉस्कोकडे रवाना झालं होतं, मात्र हे भारतीय नसल्याचं सरकारने स्पष्ट केलं आहे.