श्रीनगर - जम्मू काश्मीरमध्ये स्वातंत्र्य दिनाच्या एक दिवस आधी भारतीय सुरक्षा दलाला मोठं यश मिळालं आहे. गुप्तचर विभागाने दिलेल्या माहितीवरून पोलिसांनी जम्मूतून जैश ए मोहम्मदच्या दहशतवादी संघटनेशी संबंधित चार दहशतवाद्यांना अटक केली आहे. पकडण्यात आलेले दहशतवादी 15 ऑगस्टला जम्मू आणि काश्मीरमध्ये दहशतवादी हल्ला करण्याची तयारी करत होते.

याबाबत मिळालेल्या माहितीनुसार, जम्मू काश्मीर पोलिसांनी जम्मूमध्ये जैशच्या चार दहशतवाद्यांना अटक केली आहे. दहशतवाद्यांकडून अशीही माहिती मिळाली आहे की, पाकिस्तानमध्ये बसलेला त्यांचा सूत्रधार 15 ऑगस्टला भारतात मोठा घातपात करण्याच्या प्रयत्नात होता. हे हल्ले जम्मू आणि काश्मीरमध्ये करण्याची तयारी करत होते. दहशतवाद्यांनी अशीही माहिती दिली आहे की, ते गाड्यांमध्ये आयईडी बसवणार होते. देशभरात हल्ले करण्याची तयारी सुरु होती.

पोलिसांनी पकडलेल्या दहशतवाद्यांची नावेही समोर आली आहेत. यामध्ये तौसिफ अहमद शाह उर्फ शौकत उर्फ अदनान हा शोपियातील आहे. तर इजहार खान उर्फ सोनू खान हा उत्तर प्रदेशातील शामलीचा आहे. याशिवाय पुलवामातील जहांगीर अहमद भट्ट आणि मुतिंजर मंजूर यांचा समावेश आहे.

अटक कऱण्यात आलेले दहशतवादी सीमेपलिकडे असलेल्या जैशच्या कमांडर्सच्या संपर्कात होते. मुतजिर उर्फ शाहीद आणि अभार या दोघांनी सर्व दहशतवाद्यांना भारतात दहशतवादी हल्ल्याची जबाबादारी दिली होती. पानीपतचे रिफायनरीचे फोटो आणि व्हिडिओ पाठवणे, राम जन्मभूमीची रेकी करणे, ड्रोनच्या माध्यमातून शस्त्रे गोळा करणे ही कामे त्यांच्याकडे देण्यात आली होती.