जेएनयूचा माजी विद्यार्थी नेता तसेच कम्युनिस्ट पार्टी ऑफ इंडियाचा सदस्य कन्हैया कुमार तसेच गुजरातचे अपक्ष आमदार जिग्नेश मेवानी यांनी आज काँग्रेसमध्ये प्रवेश केला आहे. गेल्या अनेक दिवसांपासून या दोघांची काँग्रेस प्रवेशाची चर्चा सुरु होती. "आम्ही या तरुण नेत्यांसोबत काम करण्यास उत्सुक आहोत, कुमार आणि मेवानी, या देशातील सत्ताधारी फॅसिस्ट शक्तींना पराभूत करण्यासाठी लढणार," असे मत काँग्रेसचे संघटना सरचिटणीस के. सी. वेणुगोपाल यांनी व्यक्त केले.

यापुर्वीच २८ सप्टेंबर रोजी त्यांचा पक्ष प्रवेश होईल, अशी माहिती एएनआयच्या वृत्तामधून मिळाली होती होती. कन्हैया कुमारने काही दिवसांपूर्वी काँग्रेसचे माजी अध्यक्ष राहुल गांधी यांची भेट घेतली होती. त्यांच्या या भेटीमुळे कन्हैया काँग्रेसमध्ये प्रवेश करणार असल्याची चर्चा सुरु झाल्या होत्या. २०१९ साली कन्हैया कुमारनं बिहारमधील बेगुसराय मतदार संघातून भाजपविरोधात निवडणूक लढवली होती. तसेच जेएनयु विद्यापीठातील विद्यार्थी प्रतिनीधी म्हणून त्याची कारकीर्द गाजली होती. देश विरोधी नारे दिल्याच्या आरोपामुळे काही काळ तो वादात सापडला होता.

जिग्नेश मेवाणी यांनी काँग्रेसमध्ये प्रवेश करण्याचा निर्णय अचानक घेतल्याचं यामुळे दिसून आलं आहे. जिग्नेश मेवाणी हे गुजरातचे आमदार आहेत. मेवाणी यांनी देखील वारंवार भाजपचा विरोध केल्याचे पाहायला मिळाले आहे. तर गुजरातमधील पटेल समाजाचा नेता हार्दिक पटेलने देखील काही दिवसांपुर्वी काँग्रेसमध्ये प्रवेश केलेला आहे.