बंगळुरु : कर्नाटकचे माजी मुख्यमंत्री आणि विरोधी पक्षनेते सिद्धरामय्या (Siddaramaiah) यांनी राज्याच्या मुख्यमंत्र्यांबाबत वादग्रस्त विधान केलंय. मुख्यमंत्री बोम्मई (Basavaraj Bommai) आणि कर्नाटकचे भाजपचे इतर नेते पंतप्रधान नरेंद्र मोदींसमोर (Narendra Modi) कुत्र्याच्या पिलासारखं आहेत. त्यांच्यासमोर सगळे थरथर कापतात, असं त्यांनी म्हटलंय.

काँग्रेस पक्षाच्या रॅलीला संबोधित करताना सिद्धरामय्या म्हणाले, '15 व्या वेतन आयोगानं कर्नाटकला विशेष भत्ता म्हणून 5,495 कोटी रुपये मिळावेत अशी शिफारस केली होती. परंतु, अर्थमंत्री निर्मला सीतारामन (Nirmala Sitharaman) यांनी तो निधी दिला नाही. हे पैसे देता येणार नसल्याचं त्यांनी म्हटलं.'

15 व्या वेतन आयोगानं राज्याला 5,495 कोटी रुपये मिळतील, अशी शिफारस केली. परंतु, आजपर्यंत पैसे मिळालेले नाहीत. पण, हे पैसे पंतप्रधानांकडं मागण्याची हिम्मत या भाजप नेत्यांमध्ये नाही. हे लोक मोदींसमोर बोलायला घाबरतात. ते त्यांच्यासमोर कुत्र्याच्या पिलासारखं आहेत, असा घणाघातही सिद्धरामय्यांनी केलाय.

याआधी कर्नाटक भाजपचे प्रमुख नलिन कुमार कटील म्हणाले होते, 'रस्ते आणि नाले हे छोटे मुद्दे आहेत. आमचं प्राधान्य लव्ह जिहादला आहे. लोकांनी रस्ते आणि नाल्यांवर नव्हे तर लव्ह जिहादसारख्या मुद्द्यांवर लक्ष केंद्रित केलं पाहिजे.' भाजप प्रमुखांच्या वक्तव्यावर काँग्रेस नेते डीके शिवकुमार यांनी टीका केलीये. ते म्हणाले, 'हे त्यांचं अत्यंत चुकीचं विधान आहे. या लोकांचं प्राधान्य विकास नसून द्वेष पसरवण्याला असल्याचं दिसून येतं. या लोकांना देश एकत्र करण्याऐवजी तोडायचा आहे.'